रुस–श्रीलंका मैत्री सम्बन्धको ६९ वर्ष : जारकालीन अभिलेखदेखि आधुनिक साझेदारीसम्म
काठमाण्डौ, २० फेब्रुअरी । रुस र श्रीलंकाबीचको कूटनीतिक सम्बन्धले आज ६९ वर्ष पूरा गरेको छ। यो अवसरमा कोलम्बोस्थित रुसी दूतावासले दुई देशबीचको गहिरो मित्रता र आपसी सम्मानलाई उजागर गरेको छ।
सन् १९५७ फेब्रुअरी १९ मा स्थापना भएको यो सम्बन्ध विश्वास, समानता र सद्भावनाको प्रतीक बन्दै आएको छ। रुसी दूतावासले जारी गरेको विज्ञप्ति अनुसार यो सम्बन्ध रचनात्मक अन्तर्राष्ट्रिय सहकार्यको ज्वलन्त उदाहरण बनेको छ।
रोचक के छ भने श्रीलंकाले स्वतन्त्रता पाउनुभन्दा शताब्दीऔं अगाडिदेखि नै दुई देशका जनताबीच सम्बन्ध थियो। पन्ध्रौं शताब्दीमै रुसी यात्री अफानासी निकितिनले आफ्नो यात्रा संस्मरणमा यस टापू राष्ट्रको उल्लेख गरेका थिए।
त्यसपछिका शताब्दीहरूमा प्रख्यात रुसी साहित्यकार एन्टोन चेखव, इभान बुनिन, चित्रकार भासिली भेरेस्चागिनलगायतले सिलोन (श्रीलंकाको पुरानो नाम) भ्रमण गरे। सन् १८९१ मा तत्कालीन रुसी राजकुमार (पछि जार) निकोलस द्वितीयले पनि श्रीलंकाको भ्रमण गरेर पेराडेनियास्थित शाही वनस्पति उद्यानमा एउटा रुख रोपेका थिए।
बिसौं शताब्दीको उत्तरार्धमा सोभियत संघ र श्रीलंकाबीच व्यापार, अर्थतन्त्र, विज्ञान, प्रविधि र संस्कृतिका क्षेत्रमा व्यापक सहकार्य भयो। सोभियत संघको सहयोगमा औद्योगिक प्रतिष्ठानहरू स्थापना भए, यातायात मार्गहरू सञ्चालनमा आए र हजारौं श्रीलंकाली विद्यार्थीहरूले रुसमा उच्च शिक्षा हासिल गरे।
रुसी महासंघ सोभियत संघको उत्तराधिकारीका रूपमा श्रीलंकासँगको राजनीतिक संवादलाई सुदृढ गर्दै विभिन्न क्षेत्रमा सहकार्य विस्तार गरिरहेको छ।
यस ऐतिहासिक अवसरमा रुसी दूतावासले श्रीलंकाका मैत्रीपूर्ण जनतालाई हार्दिक बधाई तथा श्रीलंकाली साझेदार र सहकर्मीहरूको उज्ज्वल भविष्य, शान्ति र सफलताको कामना गरेको छ।
