चीनको दुई अधिवेशन र नेपाल–चीन सहकार्य : एउटा नयाँ यात्राको सुरुवात
# प्रेम सागर पौडेल
चीनको राजनीतिक जीवनको महत्वपूर्ण घडीका रूपमा रहेको ‘दुई अधिवेशन’ यस पटक झन विशेष बनेको छ। चिनियाँ जनराजनीतिक परामर्शदात्री सम्मेलन १४औँ राष्ट्रिय समितिको चौथो अधिवेशन तथा चिनियाँ जनकांग्रेस चौधौँ राष्ट्रिय समितिको चौथो अधिवेशन प्रारम्भ भएसँगै चीनले आफ्नो ‘पन्ध्रौं पञ्च वर्षीय योजना’ को औपचारिक सुरुवात गरेको छ। यो केवल चीनको आन्तरिक विकासको मार्गचित्र मात्र होइन, विश्वव्यापी विकास प्रतिमानमा नयाँ अध्याय थप्ने आधारशिला समेत हो।
यस वर्षको अधिवेशनले नवीन विकास, आधुनिक औद्योगिकीकरण, सुधार तथा खुलापन र पर्यावरणीय संरक्षणलाई केन्द्रमा राखेको छ। यी विषयवस्तुहरूले चिनियाँ कम्युनिस्ट पार्टी र चीन सरकारले जनताको आवश्यकता र विश्वव्यापी परिवर्तनलाई कसरी आत्मसात् गरेको छ भन्ने प्रष्ट पार्दछ। चीनको उच्च गुणस्तरीय विकासले अहिले ‘एकल प्रदर्शन’ भन्दा माथि उठेर विश्वका विभिन्न देशहरूसँग मिलेर बजाइने ‘सिम्फनी’ को रूप लिइरहेको छ।
नेपाल-चीन पारस्परिक सहयोग समाजको हैसियतले हामी चीनको विकास यात्रालाई नजिकबाट नियालिरहेका छौं। चीनले हरेक क्षेत्रमा हासिल गरेको प्रगति र उपलब्धि हाम्रा लागि प्रेरणाको स्रोत बनेको छ। विशेषगरी ‘बेल्ट एण्ड रोड’ पहलअन्तर्गत भइरहेको विकास सहकार्यले नेपाल-चीन सम्बन्धलाई नयाँ उचाइमा पुर्याएको छ।
यस वर्षको दुई अधिवेशनले चीनको ‘पन्ध्रौं पञ्च वर्षीय योजना’ को थालनी गरेको छ, जसले नवप्रवर्तन, हरित विकास र साझा समृद्धिलाई जोड दिएको छ। यी प्राथमिकताहरू नेपालको राष्ट्रिय आवश्यकता र विकास आकांक्षासँग पनि ठ्याक्कै मेल खान्छन्। हामी विश्वास गर्दछौं कि आगामी दिनमा चीनको योजना अन्तर्गत थप चिनियाँ लगानी, प्रविधि हस्तान्तरण र क्षमता विकासका कार्यक्रमहरू नेपालमा विस्तार हुनेछन्।
मार्च ५ तारिखको दिन अर्को एउटा संयोग पनि छ। सोही दिन नेपालमा पनि निर्वाचन सम्पन्न भएको छ। यसले देखाउँदछ कि दुवै देश आ-आफ्नो विकासको बाटोमा अघि बढिरहेका छन्, र यसै सन्दर्भमा चीनको दुई अधिवेशनले प्रवाहित गरेको खुलापन, नवप्रवर्तन र साझा लाभको विचारले विश्वलाई नै एउटा बहुमूल्य निश्चितता प्रदान गरेको छ।
नेपाल-चीन पारस्परिक सहयोग समाजको तर्फबाट हामी चिनियाँ कम्युनिस्ट पार्टी, चीन सरकार र महान चिनियाँ जनतालाई दुई अधिवेशनको सफल आयोजन तथा पन्ध्रौं पञ्च वर्षीय योजनाको शुभारम्भको हार्दिक बधाई तथा शुभकामना व्यक्त गर्दछौं। साथै, आगामी दिनमा नेपाल-चीन सम्बन्ध अझ प्रगाढ हुँदै जाने र दुवै देशका जनताले साझा समृद्धि हासिल गर्ने कुरामा हामी आशावादी छौं। यसै सहकार्य र साझा प्रयासबाट मात्र क्षेत्रीय शान्ति र विश्वव्यापी समृद्धिको नयाँ युगको सुरुवात हुनेछ भन्ने हाम्रो दृढ विश्वास छ।
लेखक: प्रेम सागर पौडेल नेपालका वरिष्ठ पत्रकार र अन्तर्राष्ट्रिय सम्बन्ध विश्लेषक हुनुहुन्छ। उहाँले नेपाल-चीन सम्बन्ध, हिमालय क्षेत्रको भू-राजनीति, र एसियाली सुरक्षा मुद्दाहरूमा गहन अध्ययन गर्नुभएको छ।
