मध्यपूर्वमा तेल आक्रमणको भीषण परिणाम: संयुक्त राष्ट्रसंघको चेतावनी

काठमाडौं / मध्यपूर्व क्षेत्रमा पछिल्लो समय भएका तेल रिफाइनरीमाथिका आक्रमणले मानवीय संकट झन् विकराल बन्न सक्ने संयुक्त राष्ट्रसंघीय निकायले चेतावनी दिएको छ। आइतबार जारी एक विज्ञप्तिमा संयुक्त राष्ट्रसंघीय मानवीय मामिला समन्वय कार्यालय (OCHA) ले यी आक्रमणका कारण सफा पानीको पहुँच र जनस्वास्थ्यमा गम्भीर असर पर्न सक्ने जनाएको छ।

“धेरै देशहरूमा पानी डिस्यालिनेसन प्लान्ट (समुद्री पानी शुद्धीकरण केन्द्र) माथि भएका आक्रमणहरूको श्रृंखलापछि यो नयाँ घटना आएको हो,” OCHA ले भनेको छ। कार्यालयका अनुसार पछिल्लो हिंसा भड्कनुअघि नै यो क्षेत्र ठूलो मानवीय सङ्कटबाट गुज्रिरहेको थियो।

फेब्रुअरी २८ मा अमेरिका र इजरायलले इरानमा गरेको आक्रमणपछि तेलको मूल्य १०० डलर प्रति ब्यारेल नाघेको सन्दर्भमा संयुक्त राष्ट्रसंघका महासचिव एन्टोनियो गुटेरेसका प्रवक्ता स्टेफन डुजारिकले भने, “यसले सबै कुरालाई असर गर्नेछ, जसमा संयुक्त राष्ट्रसंघका कार्यहरू पनि समावेश छन्।” उनले मूल्य वृद्धिले विश्व संस्थाको रसद आपूर्ति प्रणाली, मानवीय खाद्यान्नको लागत र खाद्यान्न उत्पादनका लागि आवश्यक मलको मूल्यसमेत बढाउने बताए।

“यसले हाम्रो जीवनशैली जीवाश्म इन्धनमा कत्ति निर्भर छ भन्ने पुष्टि गर्दछ, जसको आपूर्ति विश्वका केही क्षेत्रहरूमा मात्र केन्द्रित छ,” डुजारिकले भने, “यो हाम्रा लागि नवीकरणीय ऊर्जामा लाग्ने प्रयासलाई दोब्बर पार्ने अवसर पनि हो।”

लेबनान र गाजामा मानवीय स्थिति दिनानुदिन भयावह बन्दै गएको छ। OCHA का अनुसार दक्षिणी लेबनान र बेरुतको दक्षिणी उपनगरमा जारी निकासा आदेशका कारण ठूलो सङ्ख्यामा नागरिक विस्थापित भएका छन्। स्थानीय अधिकारीहरूका अनुसार एक लाख १५ हजारभन्दा बढी मानिस ५०० भन्दा बढी सामूहिक केन्द्रहरूमा आश्रय लिइरहेका छन् भने पाँच लाखभन्दा बढी विस्थापितको रूपमा दर्ता भएका छन्। पाँच वटा अस्पताल र दर्जनौं प्राथमिक स्वास्थ्य केन्द्रहरू बन्द हुनुपर्दा स्वास्थ्य सेवा समेत प्रभावित भएको छ।

“मानवीय स्थिति द्रुत रूपमा बिग्रँदै गएको छ। तत्काल तनाव कम गर्न आवश्यक छ,” OCHA ले भनेको छ। कार्यालयले सबै पक्षलाई अन्तर्राष्ट्रिय मानवीय कानुनको पालना गर्दै नागरिक, स्वास्थ्य संस्था र मानवीय कर्मचारीहरूको सुरक्षा गर्न आग्रह गरेको छ।

गाजा पट्टीमा पनि सीमा नाका बन्द हुँदा मानवीय कार्यमा अवरोध उत्पन्न भएको छ। जिकिम क्रसिङ बन्द हुँदा उत्तरी गाजाका लागि राहत सामग्री दक्षिणी केरेम शालोम हुँदै पठाउनुपर्ने बाध्यता छ, जसले गर्दा समय र लागत दुवै बढेको छ। चिकित्सकीय उपचारका लागि बिरामीहरूको गाजाबाट बाहिरिने क्रम रोकिएको छ भने विदेशबाट फर्कने प्यालेस्टिनीहरूको प्रवेश पनि स्थगित छ।

संयुक्त राष्ट्रसंघले सीमित स्रोतका बीच पनि आफ्ना साझेदारहरूसँग मिलेर राहत कार्य जारी राखे पनि द्रुत रूपमा बढ्दो आवश्यकता पूरा गर्न अन्तर्राष्ट्रिय समुदायको तत्काल सहयोग आवश्यक रहेको जनाएको छ।