एर्दोगानद्वारा तेहरानलाई कडा चेतावनी– ‘गलत र उत्तेजनापूर्ण कदम’ले सम्बन्ध बिग्रन सक्छ
काठमाडौं / क्षेत्रीय तनाव चुलिँदै गइरहेका बेला टर्कीका राष्ट्रपति रेसेप तैयप एर्दोगानले आफ्नो देश उच्च सतर्कतामा रहेको बताएका छन्। सोमबार अंकारामा मन्त्रीपरिषद्को बैठकपछि सञ्चारकर्मीहरूसँग कुरा गर्दै उनले ‘उत्तेजनापूर्ण कदम’ले तेहरानसँगको सम्बन्ध बिगार्न सक्ने चेतावनी दिए।
उनले भने, “हाम्रा चेतावनीका बाबजुत पनि टर्कीको मित्रतालाई तनावग्रस्त बनाउने गलत र उत्तेजनापूर्ण कदमहरू चालिन जारी छ।” हजारौं वर्ष पुरानो छिमेकी र भाइचाराको सम्बन्धमा कसैले पनि ग्रहण लगाउने कदम नचाल्न उनले आग्रह गरे।
एर्दोगानको यो टिप्पणी सोमबार बिहान इरानबाट प्रक्षेपित एउटा क्षेप्यास्त्र टर्कीको दक्षिणपूर्वी प्रान्त गाजियान्टेपमाथि रोकिएको घटनापछि आएको हो। टर्कीको हवाई क्षेत्रमा प्रवेश गरेको उक्त क्षेप्यास्त्रलाई पूर्वी भूमध्यसागरमा तैनाथ नाटोको एयर तथा मिसाइल रक्षा प्रणालीले निष्क्रिय पारेको थियो। रक्षा मन्त्रालयका अनुसार यस घटनामा कुनै मानवीय क्षति नभएको जनाइएको छ।
“हामी हाम्रा अनुभवी टोलीहरूसँग सबै विकासक्रमहरू नियालिरहेका छौं। हामी सतर्कतामा कमी आउन दिइरहेका छैनौं। हाम्रो लक्ष्य हाम्रो देशलाई यो आगोबाट टाढा राख्नु हो,” एर्दोगानले भने।
उनले टर्कीले इरानलाई आवश्यक चेतावनी दिइसकेको तर ती चेतावनीका बाबजुत पनि गलत कदम चालिन जारी रहेको बताए। “हाम्रो वायुसेनाका एफ–१६ लडाकु विमान, प्रारम्भिक चेतावनी प्रणाली र इन्धन भर्ने विमानहरूले सम्भावित खतराविरुद्ध चौबिसै घण्टा हाम्रो हवाई क्षेत्रको निगरानी गरिरहेका छन्,” राष्ट्रपतिले जानकारी दिए।
