मानभी एफसी र ब्रदर्स एफसीको शानदार जित, ब्रदर्सले २५-३ गोल अन्तरले प्रतिद्वन्द्वीलाई धुलो चटाउँदै सेमिफाइनल प्रवेश

बाँके – बाँकेको खजुरामा ब्रदर्स एफसीद्वारा जारी “प्रथम खजुरा नाइट फुटबल ५–ए साइड प्रतियोगिता २०८२” उत्साहजनक रूपमा सञ्चालन भइरहेको छ। खजुरा–४, बाँकेस्थित मुसकटवा बाबा खेल मैदान डि गाउँमा फागुन ३० गतेदेखि सुरु भएको प्रतियोगिताको चौथो दिन आज दुई रोमाञ्चक क्वाटरफाइनल खेलहरू सम्पन्न भएका छन्। पहिलो क्वाटरफाइनल खेलमा एनडीवाइएससी र मानभी एफसीबीच प्रतिस्पर्धा भएको थियो। उक्त खेलमा मानभी एफसीले उत्कृष्ट प्रदर्शन गर्दै ४–२ गोल अन्तरले जित हात पार्यो। खेलको सुरुवाती चरणमा दुवै टोलीले आक्रामक प्रदर्शन गरे पनि मानभी एफसीका खेलाडीहरूले संयमित र आक्रामक खेल प्रदर्शन गर्दै पहिलो हाफमै २–० को अग्रता लिन सफल भए। दोस्रो हाफमा एनडीवाएससीले पुनरागमनको प्रयास गरे पनि मानभी एफसीको बलियो रक्षापंक्ति र आक्रामक रणनीतिले उनीहरूलाई सफल हुन दिएन। अन्ततः मानभी एफसीले ४–२ को जितसहित सेमिफाइनलको यात्रा तय गरेको छ।

त्यस्तै, दोस्रो क्वाटरफाइनल खेल ब्रदर्स एफसी (ए) र ब्रदर्स लिजेन्डबीच भएको थियो। यस खेलमा ब्रदर्स एफसी (ए) ले अविश्वसनीय प्रदर्शन गर्दै २५–३ गोल अन्तरको ऐतिहासिक जित हात पारेको छ। ब्रदर्स एफसी (ए) का खेलाडीहरूले सुरुदेखि नै पूर्ण प्रभुत्व जमाउँदै विपक्षी टोलीमाथि दबाब सिर्जना गरेका थिए। पहिलो हाफमा मात्र ब्रदर्स एफसी (ए) ले १५ गोल गर्दै प्रतिद्वन्द्वीलाई स्तब्ध बनाएको थियो। दोस्रो हाफमा पनि उनीहरूको आक्रामक खेल जारी रह्यो र थप १० गोल थप्दै खेल आफ्नो पक्षमा पारे। ब्रदर्स लिजेन्डका तर्फबाट ३ गोल फर्काउन सके पनि ब्रदर्स एफसी (ए) को आक्रामक रणनीतिसामू टिक्न सकेनन्।

यस जितसँगै ब्रदर्स एफसी (ए) ले पनि सेमिफाइनलमा स्थान पक्का गरेको छ। प्रतियोगिताको सेमिफाइनल खेलहरू अब केही दिनपछि हुने आयोजकले जनाएको छ। फुटबलप्रेमीहरूका लागि यो प्रतियोगिता रोमाञ्चक र उत्साहजनक बन्दै गएको छ। आजको दुवै खेलले प्रतियोगिताको स्तर र प्रतिस्पर्धाको तीव्रतालाई अझ माथि उठाएको छ।