चीन-भियतनाम सहकार्य : रणनीतिक विश्वासदेखि दक्षिण चीन सागर स्थिरतासम्म ६ बुँदे सहमति
हनोई / चिनियाँ विदेशमन्त्री वाङ यीले मंगलबार चीन-भियतनाम द्विपक्षीय सहकार्य स्टेयरिङ कमिटीको १७औं बैठकका प्रमुख उपलब्धिहरू सार्वजनिक गरेका छन्। चिनियाँ कम्युनिष्ट पार्टी केन्द्रीय समितिको राजनीतिक ब्युरो सदस्यसमेत रहेका वाङ यीले हनोईमा उक्त बैठक तथा कूटनीति, रक्षा र सार्वजनिक सुरक्षासम्बन्धी पहिलो ‘३+३’ रणनीतिक संवादको मन्त्रीस्तरीय बैठकपछि चिनियाँ सञ्चारमाध्यमसँगको अन्तर्वार्तामा यी उपलब्धिहरू साझा गरेका हुन्।
वाङ यीका अनुसार दुवै पक्षबीच रणनीतिक विश्वास अभिवृद्धि गर्ने, उच्चस्तरीय आदानप्रदान सुदृढ गर्ने, शासनसम्बन्धी अनुभव आदानप्रदान बढाउने, शासन क्षमता निरन्तर सुधार गर्ने र पार्टी सुदृढीकरण तथा राष्ट्र विकासका बाटोहरू संयुक्त रूपमा खोज्ने सहमति भएको छ।
दुवै पक्षले सुरक्षा समन्वय समृद्ध बनाउन साइबर सुरक्षा, अनलाइन जुवा र दूरसञ्चार ठगी नियन्त्रण, फरार प्रत्यर्पण र सम्पत्ति बरामदजस्ता क्षेत्रमा सहकार्य गहिरो बनाउने र दुई सेनाबीच राजनीतिक कार्य, संयुक्त अभ्यास तथा प्रशिक्षण, सीमा तथा तटीय सुरक्षामा सहयोग सुदृढ गर्ने सहमति जनाएका छन्।
व्यापार तथा लगानी, पूर्वाधार, सीमापार आर्थिक सहकार्य क्षेत्र र स्मार्ट पोर्टमा सहकार्य विस्तार गर्ने, साथै प्रविधि नवप्रवर्तन, डिजिटल अर्थतन्त्र र कृत्रिम बौद्धिकताजस्ता उदीयमान क्षेत्रमा सहकार्य प्रवर्द्धन गर्ने विषयमा पनि सहमति भएको वाङ यीले बताए।
संस्कृति तथा पर्यटन, शिक्षा तथा तालिम, र स्वास्थ्य सेवाजस्ता क्षेत्रमा सहकार्य सुदृढ गर्ने र भियतनाममा जनजीविका सुधारका लागि चिनियाँ सहायता परियोजनाहरूको कार्यान्वयन तीव्रता दिई यी परियोजनालाई दुवै देशका जनताका लागि मूर्त र पहुँचयोग्य बनाउने सहमति भएको छ।
दुवै पक्षले मतभेद उचित व्यवस्थापन गर्ने, समुद्री वार्ता संयन्त्रको सदुपयोग गर्ने, कम संवेदनशील क्षेत्रमा समुद्री सहकार्य प्रवर्द्धन गर्ने र बेइबु खाडी मुहानबाहिरको जलक्षेत्र सीमांकन तथा संयुक्त समुद्री विकासमा यथाशीघ्र ठोस प्रगति गर्ने सहमति जनाएको छ, जसले दक्षिण चीन सागरमा शान्ति र स्थिरता कायम राख्न मद्दत गर्नेछ।
वाङ यीका अनुसार दुवै पक्षले बहुपक्षीय समन्वय अभिवृद्धि गर्ने, वास्तविक बहुपक्षवाद कायम राख्ने, खुला क्षेत्रीयवाद अभ्यास गर्ने, सम्पूर्ण मानवजातिको साझा मूल्यहरू प्रवर्द्धन गर्ने र विश्व शासन प्रणालीलाई अझ न्यायपूर्ण तथा समतामूलक दिशातर्फ अघि बढाउने सहमति समेत जनाएका छन्।
