खार्कोभ क्षेत्रमा चार बस्तीका लागि लडाइँ जारी रहेको रुसको भनाइ

ड्रागन मिडिया समाचार कक्ष

रुसी रक्षा मन्त्रालयले खार्कोभ क्षेत्रका वार्वारोभ्का, निकोलायेभ्का, लोबानोभ्का र रेज्निकोभो बस्तीमा नियन्त्रण कायम गर्न रुसी सेनाले लडाइँ गरिरहेको जनाएको छ। मन्त्रालयका अनुसार उत्तर समूहले उत्तरपूर्वी क्षेत्रमा घेराबन्दी कस्दै आफ्नो नियन्त्रण क्षेत्र विस्तार गरिरहेको छ।

मन्त्रालयले रुब्लेनोये, नेफेदोभ्का, कुपिनो र चेर्नोये आसपास घेराबन्दीमा परेका युक्रेनी सैनिकविरुद्ध कारवाही जारी रहेको बताएको छ। नियन्त्रण क्षेत्र विस्तार गर्ने क्रममा प्रिकोलोत्नोये र अन्नोपोल्ये नजिक पनि लडाइँ भइरहेको तथा बेरेझ्नोये, पोद्स्रेद्नेये, कुर्गानोये र माली बुर्लुकमा युक्रेनी फौजलाई निसाना बनाइएको उसको दाबी छ।

मन्त्रालयका अनुसार डोनेत्स्क जनगणतन्त्रको डोब्रोपोल्ये सहरको उत्तरी र मध्य भागमा रुसी सेनाको ५१औँ सेनाका आक्रमणकारी समूह अघि बढेका छन्। पूर्वी आवासीय क्षेत्र खाली गराएपछि सामुद्रिक सेनाका एकाइले उत्तरी भागतर्फ अघि बढेको र एकै दिनमा ५३ भवन नियन्त्रणमा लिएको मन्त्रालयले जनाएको छ। उक्त कारवाहीमा २० जनासम्म युक्रेनी सैनिक मारिएको पनि उसको दाबी छ।

रुसी रक्षा मन्त्रालयले पछिल्लो एक दिनमा वायु रक्षा प्रणालीले चार निर्देशित हवाई बम, अमेरिकामा निर्मित हिमार्स बहुप्रक्षेपण रकेटका तीन प्रक्षेप्य र पखेटायुक्त १,२२२ मानवरहित विमान खसालेको जनाएको छ। युक्रेनमा रुसी सैन्य कारवाही शुरु भएयता ६७४ विमान, २८४ हेलिकप्टर, २,५२,०५३ मानवरहित विमान, ६७२ वायु रक्षा प्रणाली, ३१,१२१ ट्याङ्क तथा अन्य बख्तरबन्द सवारीसाधन, १,७८४ बहुप्रक्षेपण रकेट प्रणालीका लडाकु सवारी, ३६,६२४ तोप तथा मोर्टार र ७३,५६८ सैन्य प्रयोजनका सवारीसाधन नष्ट गरेको मन्त्रालयको दाबी छ।