संरक्षणवादले प्रतिस्पर्धात्मकता बढाउँदैन, अलगावले सबैलाई हानि गर्छ : चीन
ड्रागन मिडिया समाचार कक्ष
संरक्षणवादले प्रतिस्पर्धात्मकता बढाउन नसक्ने र आर्थिक सम्बन्ध विच्छेद गर्दा सबैलाई हानि हुने चीनले जनाएको छ। चीनको वाणिज्य मन्त्रालयका प्रवक्ताले मंगलबार खुलापन र सहकार्य नै विकासको सही मार्ग भएको बताएका हुन्।
फ्रान्स र जर्मनीले युरोपेली आयोगलाई व्यापार प्रतिरक्षा उपायको प्रयोग सुदृढ गर्न र नयाँ संरक्षणवादी उपकरण ल्याउन आग्रह गर्दै सोमबार अनौपचारिक दस्तावेज बुझाएको समाचार सार्वजनिक भएपछि चीनको यस्तो प्रतिक्रिया आएको हो।
चीनले अन्तरनिर्भरता जोखिम नभएको र परस्पर जोडिएका हितलाई खतरा मान्न नहुने विश्वास राख्दै आएको प्रवक्ताले बताए। विश्व अर्थतन्त्रमा महत्त्वपूर्ण भूमिका रहेका फ्रान्स र जर्मनीले खुलापन, सहकार्य र स्वतन्त्र व्यापारको पक्षमा उभिँदै विश्व व्यापार सङ्गठनका नियम पालना गर्नुपर्ने चीनको अपेक्षा रहेको उनले बताए।
युरोपेली सङ्घलाई पटकपटक संरक्षणवादी उपाय अपनाउन प्रोत्साहन नगर्न, आर्थिक तथा व्यापारिक विषयलाई राजनीतिकरण नगर्न र राष्ट्रिय सुरक्षाको अवधारणालाई अति विस्तार नगर्न पनि चीनले आग्रह गरेको छ। गलत बाटो रोज्दा अन्ततः उनीहरूलाई नै हानि पुग्ने प्रवक्ताको भनाइ थियो।
