क्यानडाले रुसी सम्पत्ति जफत गरे तत्काल जवाफी कदम चाल्ने राजदूतको चेतावनी
ड्रागन मिडिया समाचार कक्ष
क्यानडाले रुसी सम्पत्ति जफत गरे रुसले तत्काल जवाफी कदम चाल्ने क्यानडाका लागि रुसी राजदूत ओलेग स्टेपानोभले चेतावनी दिएका छन्। यस्तो कानुन बनाउँदा त्यसबाट उत्पन्न हुने कानुनी, लगानीसम्बन्धी र प्रतिष्ठागत परिणामबारे ओटावाका राजनीतिज्ञले विचार गर्नुपर्ने उनको भनाइ छ।
‘इज्भेस्तिया’सँगको अन्तर्वार्तामा स्टेपानोभले सार्वभौम सम्पत्तिसम्बन्धी विधेयक एस–२१४ ले मे २६ मा क्यानडाको माथिल्लो सदनको चरण पूरा गरी तल्लो सदनमा विचारका लागि प्रवेश गरेको बताए। प्रतिबन्धित व्यक्ति र संस्थाको सम्पत्ति व्यवस्थापन गर्ने, त्यसलाई राज्यको स्वामित्वमा हस्तान्तरण गर्न सकिने व्यवस्थासहितको विधेयक सी–२१९ पनि तयार भइरहेको उनले उल्लेख गरे।
“‘रुसी सम्पत्ति’ भन्नाले के बुझाइएको हो र क्यानडामा त्यस्तो सम्पत्ति कहाँ खोज्ने भन्ने कुरा भन्न कठिन छ। तर क्यानडा वा अन्यत्र सम्पत्तिमाथि हुने यस्तो अतिक्रमणबारे रुसको धारणा स्पष्ट छ। यस्ता कदम गैरकानुनी हुन् र रुसले तत्काल जवाफ दिनेछ,” स्टेपानोभले भने।
क्यानडाको टोरोन्टो विमानस्थलमा सन् २०२२ को फेब्रुअरीदेखि रोकिएको भोल्गा–द्नेपर एयरलाइन्सको एएन–१२४ विमानबारे पनि उनले बोले। कम्पनीले कानुनी माध्यमबाट विमान फिर्ता गराउन प्रयास जारी राखेको राजदूतले बताए। विमान यसको मालिकलाई फिर्ता गर्नुपर्ने र जफत गरिए रुसले सम्पत्तिसम्बन्धी तथा अन्य जवाफी कदम चाल्ने अधिकार सुरक्षित राख्ने उनको भनाइ छ।
