उन्नत जौको बीउबाट सिचाङको चुसुममा उत्पादन वृद्धि
ड्रागन मिडिया समाचार कक्ष
सिचाङ स्वायत्त क्षेत्रको ल्होखा शहरस्थित चुसुम जिल्लामा उन्नत जौको बीउबाट उत्पादन बढेको छ। जिल्लाले यस वर्ष १२०० म्यु, अर्थात् करिब ८० हेक्टर जमिनमा कालो जौ र तिब्बती जौका उन्नत जात लगाएको थियो।
कृषि विभागका अनुसार ८०० म्युमा लगाइएको कालो जौले प्रतिम्यु औसत ४५० किलो उत्पादन दिएको छ। स्थानीय परम्परागत बीउबाट हुने उत्पादनभन्दा प्रतिम्यु १६० किलो बढी हो। त्यस्तै, ४०० म्युमा लगाइएको तिब्बती जौको जात नम्बर ३००० ले प्रतिम्यु औसत ३०० किलो उत्पादन दिएको छ, जुन परम्परागत बीउभन्दा १० किलो बढी हो।
यी दुई जातबाट मात्रै सामान्य बीउ लगाउँदा भन्दा करिब १३२ टन बढी अन्न उत्पादन भएको जिल्लाका अधिकारीहरूले बताएका छन्। परम्परागत बीउ लामो समयसम्म प्रयोग गर्दा उत्पादन घटेर प्रतिम्यु औसत करिब २९० किलोमा सीमित भएको थियो।
ल्हुन्त्से जिल्लाबाट ल्याइएका उन्नत बीउलाई तोपगिजाङ, शाक्बाङ र चुसुम नगरक्षेत्रमा एकै ठाउँमा जोडिएका खेतमा परीक्षणका रूपमा लगाइएको थियो। रोपाइँदेखि बाली भित्र्याउँदासम्मको अनुभवले किसान र कृषि प्राविधिकमा नयाँ जातप्रति विश्वास बढेको अधिकारीहरूले बताएका छन्।
जौ भित्र्याएपछि हिउँदे गहुँ लगाउने तयारी भइरहेको छ। आगामी वर्ष जिल्लाभर यी दुवै उन्नत जात विस्तार गर्ने लक्ष्यसहित किसानसँग समन्वय भइरहेको जनाइएको छ।
