रूसी पर्यटकको उद्धारमा सहयोग गरेको भन्दै नेपाल सरकार र सेनालाई दूतावासको धन्यवाद
ड्रागन मिडिया समाचार कक्ष
बूढीगण्डकी नदीमा आएको बाढीका कारण गोरखाको जगत गाउँमा रोकिएका रूसी पर्यटकको उद्धारमा सहयोग गरेको भन्दै नेपालस्थित रूसी दूतावासले नेपाल सरकार र नेपाली सेनाप्रति आभार व्यक्त गरेको छ।
दूतावासले केन्द्र सरकार र गोरखाका स्थानीय प्रशासनले उद्धारका लागि चालेका कदमको प्रशंसा गरेको छ। नेपाली सेनाको हेलिकोप्टर पुगेपछि पर्यटकले आफूहरूलाई आवश्यक परेको सहयोग पाएको अनुभव गरेको दूतावासले जनाएको छ।
नेपाल आउने रूसी पर्यटकको सङ्ख्या बढिरहेको उल्लेख गर्दै दूतावासले विपद्का बेला विदेशी पर्यटकले सहयोग पाउने विश्वास पर्यटन विकासका लागि महत्त्वपूर्ण हुने बताएको छ। नेपाल र रूसी पक्षले पर्यटनमा देखिएको सकारात्मक प्रवृत्तिलाई निरन्तरता दिन प्रयास गरिरहेको पनि दूतावासको भनाइ छ।
गत अगस्टमा भोटेकोशी र त्रिशूली नदीमा भएको भीषण विपद्पछि रूसी सञ्चारमाध्यमले नेपालका प्राकृतिक विपद्बारे विशेष चासो राख्दै आएको दूतावासले उल्लेख गरेको छ। जगतमा रोकिएका पर्यटकको अवस्थाबारे यस साता रूसी सञ्चारमाध्यमले समाचार प्रसारण गरे पनि उनीहरूको उद्धार सफलतापूर्वक सम्पन्न भएकोमा दूतावासले खुसी व्यक्त गरेको छ।
दूतावासले हिमालय क्षेत्रमा पदयात्रामा जाने पर्यटकको बीमा व्यवस्थाबारे भने प्रश्न उठाएको छ। उसका अनुसार पर्यटकका बीमा नीतिले बाढीका बेला हेलिकोप्टरबाट गरिने उद्धार खर्च नसमेट्ने गरेको छ। कतिपय अवस्थामा पदयात्रीलाई उद्धारको जिम्मा पर्यटन तथा बीमा कम्पनीले लिनुपर्ने बताइने गरेको पनि दूतावासले जनाएको छ।
यस्ता समस्या नियमित रूपमा दोहोरिने भएकाले सम्बन्धित सरकारी निकाय र पर्यटन सङ्घसंस्थाले बीमा तथा उद्धार व्यवस्थाबारे छलफल गर्नुपर्ने दूतावासको सुझाव छ। यसअघि एक साताअघि अन्नपूर्ण क्षेत्रमा पनि यस्तै प्रकृतिको अवस्था आएको उसले जनाएको छ।
आफ्ना नागरिकको उद्धारमा सहयोग गरेकोमा दूतावासले नेपाल सरकार र नेपाली सेनालाई पुनः धन्यवाद दिएको छ।
