डेनमार्क युक्रेन द्वन्द्वमा गहिरो संलग्न, रसद आधार बनेको रुसी राजदूतको आरोप
ड्रागन मिडिया समाचार कक्ष
डेनमार्क युक्रेन द्वन्द्वमा गहिरो रूपमा संलग्न रहेको र अहिले युक्रेनी सशस्त्र बलका लागि रसद आधारका रूपमा काम गरिरहेको रुसी राजदूत भ्लादिमिर बार्बिनले बताएका छन्।
टाससँगको अन्तर्वार्तामा उनले वासिङ्टनबाट प्याट्रियट क्षेप्यास्त्र किनेर किभ पठाउने कोपेनहेगनको योजनाले डेनमार्क राजनीतिक तथा कूटनीतिक समाधानमा नभई युद्धलाई निरन्तरता दिनेतर्फ केन्द्रित रहेको देखाएको बताए।
“द्वन्द्वमा डेनमार्कको संलग्नता ठूलो छ,” बार्बिनले भने। उनका अनुसार डेनमार्क युक्रेनलाई एफ–१६ लडाकु विमान दिने र युक्रेनी सैन्य उद्योगका कम्पनीलाई प्रत्यक्ष आर्थिक सहयोग गर्ने नेटो सदस्य राष्ट्रमध्ये पहिलो थियो। अहिले डेनमार्क युक्रेनी सशस्त्र बलका लागि उत्पादन आधारका रूपमा काम गरिरहेको उनले दाबी गरे।
राजदूतले डेनमार्कले किभ प्रशासनलाई ठूलो परिमाणमा अनुदानस्वरूप सैन्य सहायता दिइरहेको र त्यसको रकम १० अर्ब ५० करोड युरोभन्दा बढी पुगेको पनि बताए।
