शिवरात्रि आयोजनाका लागि १७१ जनाको विशाल समिति गठन
काठमाडौं — संस्कृति, पर्यटन तथा नागरिक उड्डयनमन्त्री एवं पशुपति क्षेत्र विकास कोष सञ्चालक परिषदका अध्यक्ष अनिलकुमार सिन्हाको अध्यक्षतामा महाशिवरात्रि २०८२ को आयोजनाका लागि १७१ सदस्यीय मूल समारोह समिति गठन गरिएको छ।
यस वर्षको महाशिवरात्रि पर्वको तयारीका लागि गठन गरिएको समितिमा काठमाडौं महानगरपालिका, वडा नं ८ कार्यालय लगायत सरोकार भएका निकायका प्रतिनिधिलाई पनि सदस्य राखिएको छ। समिति पशुपति क्षेत्रमा महाशिवरात्रि पर्वको तयारीका लागि काम गर्ने पशुपति क्षेत्र विकास कोषले जनाएको छ।
मूल समारोह समिति अन्तर्गत नौवटा विषयगत उपसमिति बनाएर पशुपति क्षेत्रमा महाशिवरात्रिको तयारीका लागि काम भइरहेको कोषका कार्यकारी निर्देशक एवं प्रवक्ता सुभाषचन्द्र जोशीले जानकारी दिए। मूल समारोह समिति अन्तर्गत सुरक्षा उपसमितिको बैठक बसेको थियो।
काठमाडौंका प्रमुख जिल्ला अधिकारी ईश्वरराज पौडेलको अध्यक्षतामा बसेको सुरक्षा उपसमितिको बैठकमा नेपाली सेना, नेपाल प्रहरी, सशस्त्र प्रहरी बल, राष्ट्रिय अनुसन्धान विभागका अधिकारीहरूको पनि उपस्थिति थियो। बैठकमा महाशिवरात्रि पर्वमा सुरक्षा व्यवस्था मिलाउने बारेमा छलफल भएको थियो।
