प्राचीन गौरवको धर्तीमा आधारित “समृद्ध नेपाल, सुखी नेपाली” को संकल्प: अध्यक्ष ओलीले सुनाए राष्ट्रिय पुनरुत्थानको मन्त्र
झापा, – नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले ‘समृद्ध नेपाल, सुखी नेपाली’ को राष्ट्रिय आकांक्षा नेपालको प्राचीन सभ्यता र वैदिक ज्ञानको मर्मबाट स्फुरित रहेको दावी गर्दै देशको गौरवशाली अतीतलाई आधुनिक विकासको आधार बनाउने आह्वान गरेका छन्।
झापाको एक धार्मिक समारोहलाई सम्बोधन गर्दै अध्यक्ष ओलीले नेपाललाई पाँच हजार वर्ष पुरानो इतिहास बोकेको ज्ञान-विज्ञानमा अग्रणी राष्ट्र बताउँदै भने, “हामी सबभन्दा अगाडि थियौं विश्वमा। ज्ञान सृष्टि यो अनेक रचना यी सबै गर्ने हाम्रा पूर्वजहरू थिए।”
उनले “सर्वे भवन्तु सुखिनः” (सबै सुखी हुन्) को वैदिक मन्त्रलाई नै आधुनिक समृद्धिको दार्शनिक आधार बताउँदै यसलाई राष्ट्र निर्माणको मूलमन्त्र घोषणा गरे।
अध्यक्ष ओलीले हिन्दु राष्ट्र र सनातन धर्मबीच स्पष्ट अन्तर रेखाङ्कित गर्दै सनातन परम्परालाई नेपालको मूल सांस्कृतिक पहिचान र सबै धर्मावलम्बी नेपालीको साझा सम्पदा ठहर गरे। उनको तर्क अनुसार, ‘हिन्दु राष्ट्र’ भन्ने अवधारणा पछिल्लो समयमा आएको भए तापनि सनातन मूल्य र दर्शन नेपाली सभ्यताको हृदयमा सदियोंदेखि प्रवाहित छ।
देशलाई देवभूमि, तपोभूमि र ज्ञानभूमिको संज्ञा दिँदै ओलीले हराइरहेको राष्ट्रिय गौरव पुनर्स्थापना गर्ने संकल्प दोहोर्याए। उनले विश्वप्रसिद्ध चिकित्साशास्त्री ऋषि सुश्रुतलाई विश्वको प्रथम शल्यचिकित्सक घोषणा गर्दै नेपालबाटै चिकित्सा विज्ञानको शुरुआत भएको ऐतिहासिक तथ्य प्रस्तुत गरे।
उम्मेदवारको हैसियतमा उपस्थित भए तापनि अध्यक्ष ओलीले आफू चुनाव प्रचारको लागि होइन, देश बनाउने संकल्पलाई दोहोर्याउन आएको स्पष्ट पारे। उनले निर्वाचन आचारसंहिताको कडाईले पालना गर्नुको साथै आफूले चाहेर पनि धार्मिक अनुष्ठानमा दान गर्न नपाएको बाध्यताको पनि उल्लेख गरे।
यसै क्रममा उनले नेपालको प्राचीन ज्ञान-विज्ञानलाई आधुनिक शिक्षा र विकासको आधार बनाउने, र समृद्धिको लक्ष्य प्राप्तिका लागि वैदिक “सर्वे भवन्तु सुखिनः” को भावना अनुसार सबै नेपालीको सुख-समृद्धि नै अन्तिम उद्देश्य रहेको बताए।
