इंग्ल्यान्डमाथि ३० रनको सानदार जित: वेस्ट इन्डिज सुपर एटको दैलोमा
दुईपल्टको ट्वान्टी–२० विश्वकप विजेता वेस्ट इन्डिजले बिहीबार इंग्ल्यान्डमाथि ३० रनको प्रभावशाली जित निकाल्दै प्रतियोगितामा आफ्नो दाबेदारी मजबुत बनाएको छ। लगातार दोस्रो जित दर्ता गर्दै वेस्ट इन्डिज समूह ‘सी’ मा चार अंकसहित शीर्ष स्थानमा उक्लिएको छ र सुपर एट चरणतर्फ निर्णायक कदम चालेको छ।
वानखेडे स्टेडियममा खेलिएको प्रतिस्पर्धात्मक खेलमा १ सय ९७ रनको चुनौतीपूर्ण लक्ष्य पछ्याएको इंग्ल्यान्ड १९ ओभरमै १ सय ६६ रनमा अलआउट भयो। सुरुआती चरणमा आक्रामक संकेत देखिए पनि इंग्ल्यान्डले साझेदारीलाई ठूलो स्कोरमा परिणत गर्न नसक्दा दबाबमा पर्यो।
इंग्ल्यान्डका ओपनर फिल साल्टले १४ बलमा ३० रनको तीव्र सुरुआत दिए भने ज्याकोब बेथलले २३ बलमा ३३ रन जोडे। तर दुवै खेलाडी टिकेर खेल्न नसक्दा इंग्ल्यान्डको इनिङ्स स्थायित्व पाउन सकेन। अलराउन्डर साम करनले ३० बलमा ४३ रन बनाएर अन्तिमसम्म संघर्ष गरे पनि टोलीलाई लक्ष्यसम्म पुर्याउन पर्याप्त भएन।
बलिङतर्फ वेस्ट इन्डिजका गुडाकेश मोटी सर्वाधिक सफल सावित भए। उनले ३३ रन खर्चेर ३ विकेट झारे र इंग्ल्यान्डको मध्यक्रम भत्काउन महत्वपूर्ण भूमिका खेले। रोस्टन चेजले २ विकेट हात पार्दै विपक्षीलाई पुनः लय समात्न दिएनन्।
यसअघि टस जितेर पहिले ब्याटिङ गरेको वेस्ट इन्डिजले ६ विकेट गुमाएर १ सय ९६ रनको प्रतिस्पर्धात्मक स्कोर खडा गरेको थियो। सुरुआत भने वेस्ट इन्डिजका लागि अनुकूल रहेन। टोलीले मात्र ८ रन बनाउँदासम्म आफ्ना दुवै ओपनर ब्रान्डन किङ र कप्तान साइ होपलाई गुमाएको थियो। प्रारम्भिक झट्कापछि मध्यक्रमले जिम्मेवारी बहन गर्दै इनिङ्स सम्हाल्ने प्रयास गर्यो।
सेरफन रथरफोर्डको सानदार अर्धशतकले वेस्ट इन्डिजको इनिङ्सलाई गति दियो। दबाबबीच संयम र आक्रामकता दुवैलाई सन्तुलनमा राख्दै उनले टोलीलाई सम्मानजनक लक्ष्यसम्म पुर्याए। अन्त्यतिरको तीव्र रनगतिको योगदानले इंग्ल्यान्डमाथि मनोवैज्ञानिक दबाब सिर्जना गरेको थियो।
यस जितसँगै वेस्ट इन्डिजले सुपर एट चरणमा स्थान सुनिश्चित गर्ने सम्भावना बलियो बनाएको छ। अर्कोतर्फ, अघिल्लो खेलमा नेपालमाथि ४ रनको कठिन जित निकालेको इंग्ल्यान्ड भने दुई खेलबाट दुई अंकमै सीमित रहँदै समूहको तेस्रो स्थानमा झरेको छ।
प्रतियोगिताको सुरुआती चरणमै वेस्ट इन्डिजले देखाएको सन्तुलित ब्याटिङ र अनुशासित बलिङ प्रदर्शनले टोली पुनः उपाधि होडमा गम्भीर दाबेदारका रूपमा उदाएको संकेत दिएको छ। आगामी खेलहरूमा यही लय कायम राख्न सके वेस्ट इन्डिज सुपर एट मात्र होइन, उपाधि यात्रातर्फ पनि दृढ पाइला चाल्न सक्ने देखिन्छ।
