प्रसाईंद्वारा हिरासतबाटै चुनावलाई ‘कालो दिन’ घोषित गर्दै हिसाब माग्ने चेतावनी
भक्तपुर, नेपाल – राष्ट्र, राष्ट्रियता, धर्म, संस्कृति तथा नागरिक बचाउ अभियानका संयोजक दुर्गा प्रसाईंले आफू हिरासतमा रहेकै अवस्थामा सम्पन्न निर्वाचनलाई मान्यता नदिने बताएका छन्। भक्तपुर प्रहरी परिसरको हिरासतमा रहेका प्रसाईंले आफ्नो सचिवालयको सहयोगमा सामाजिक सञ्जालमार्फत वक्तव्य सार्वजनिक गर्दै आजको दिनलाई ‘कालो दिन’ को संज्ञा दिएका हुन्।
उनको वक्तव्यमा निर्वाचनलाई पश्चिमा शक्तिको डिजाइनमा जनतामाथि जबरजस्ती थोपरिएको आरोप लगाइएको छ। “ज्यानमारा, भ्रष्ट, सिंहदरबारदेखि सम्मानित सर्वोच्च अदालतसम्म आगो लगाउने, सहकारी ठगीमा संलग्न गिरोह, ७५ जना बालबालिकाको ज्यान जाने अवस्था सिर्जना गर्ने र खर्बौंको सम्पत्ति नष्ट गर्ने गिरोहहरूले पश्चिमाको डिजाइनमा देश र नागरिकलाई रुवाएर जबरजस्ती थोपरेको यो चुनाव हामीलाई मान्य छैन,” प्रसाईंले भनेका छन्।
उनले आज भ्रष्ट ठगहरूले जितेको र देशले हारेको कालो दिन भएको टिप्पणी गरेका छन्। फागुन १७ गते सार्वजनिक शान्तिविरुद्धको कसुरमा भक्तपुरस्थित आफ्नै निजी निवासबाट पक्राउ परेका प्रसाईंले थप्दै भनेका छन्, “एक जना राष्ट्रवादी व्यक्तिसँग डराएर थुनेर गरिएको चुनावको हिसाब–किताब एक दिन अवश्य हुनेछ।”
हिरासतमा रहेका प्रसाईंको यो वक्तव्यले निर्वाचनलाई लिएर थप राजनीतिक तरंग ल्याउने देखिएको छ भने प्रशासन र सुरक्षा निकायको ध्यानाकर्षण समेत भएको छ।
