मेकाेङ रिभरमा चारदेशीय संयुक्त गस्ती सम्पन्न, वसन्त पर्वमा जलसुरक्षामा कडाइ
बेईजिङ / चीन, लाओस, म्यानमार र थाइल्याण्डका कानुन कार्यान्वयन निकायहरूको सहभागितामा सञ्चालित मेकाेङ रिभर (चीनमा लान्साङ नदीका नामले परिचित) को १६२औँ संयुक्त गस्ती शुक्रबार सफलतापूर्वक सम्पन्न भएको छ। वसन्त पर्व (स्प्रिङ फेस्टिभल) को व्यस्त अवधिमा अन्तरदेशीय जलमार्गको सुरक्षा सुदृढ गर्ने उद्देश्यसहित सञ्चालन गरिएको उक्त अभियानले पाँच दिन र चार रात निरन्तर गस्ती गरेको थियो।
करीब ७०० किलोमिटरभन्दा बढी दूरी समेटिएको यस अभियानमा चार देशका १०१ जना सुरक्षाकर्मी र पाँच वटा गस्ती जहाज सहभागी भएका थिए। नदीको सुक्खा याम र ढुवानीको उच्च सिजन एकैसाथ परेकाले सम्भावित सुरक्षा चुनौती, जलयात्रा दुर्घटनाको जोखिम, डुङ्गा अड्किने तथा चट्टानमा ठोक्किने जस्ता घटनालाई ध्यानमा राख्दै उच्च जोखिमयुक्त जलक्षेत्रमा विशेष निगरानी गरिएको जनाइएको छ।
गस्ती टोलीले स्थल तथा जलमार्ग दुवै माध्यमबाट निरीक्षण गर्दै ५० भन्दा बढी जलयान, २०० भन्दा बढी व्यक्तिहरू तथा करिब ५,००० टन मालसामान जाँच गरेको थियो। साथै, जलयात्रा सुरक्षा सम्बन्धी सुझाव–परामर्श प्रदान गर्नुका साथै समस्यामा परेका एक व्यापारी जहाजको उद्धारसमेत गरिएको थियो। यसले नदी क्षेत्रमा शान्ति, सुव्यवस्था र सुरक्षित आवागमन कायम राख्न उल्लेखनीय योगदान पुर्याएको अधिकारीहरूले बताएका छन्।
सन् २०११ को डिसेम्बरमा प्रारम्भ गरिएको यो संयुक्त गस्ती संयन्त्रले क्षेत्रीय स्थायित्व र विश्वास अभिवृद्धिमा महत्वपूर्ण भूमिका खेल्दै आएको छ। दक्षिण–पूर्वी एसियाका यी चार राष्ट्रबीचको सीमा पार ढुवानीका लागि मेकाेङ रिभर प्रमुख जलमार्गका रूपमा रहेको छ। निरन्तर सहकार्य र समन्वय मार्फत यस जलमार्गको सुरक्षा सुदृढ बनाउँदै लैजान चारै देश प्रतिबद्ध रहेको जनाइएको छ।
