बर्लिनको पहलमा रुस–जर्मनी सम्बन्ध ध्वस्त : रुसी राजदूत नेचायेवको अन्तर्वार्तामा तीखो टिप्पणी
काठमाडौं । रुसी राजदूत सर्गेई नेचायेवले जर्मनीसँगको द्विपक्षीय सम्बन्ध लगभग पूर्ण रूपमा ध्वस्त भएको बताएका छन्। उनले फेब्रुअरी १४ मा रुसी समाचार एजेन्सी आरआइए नोभोस्तीलाई दिएको अन्तर्वार्तामा बर्लिनकै पहलमा सम्बन्ध चरम तनावपूर्ण अवस्थामा पुगेको आरोप लगाए।
राजदूत नेचायेवले जर्मनीमा रुसी नियोगहरूविरुद्ध जासुस, ह्याकर तथा प्रचार अभियानको झूठा आरोप लगाइएको भन्दै यसको उद्देश्य रुसी नियोगहरूसँगको सम्पर्कलाई विषाक्त बनाउनु रहेको टिप्पणी गरे। उनले भने, “यी आरोपहरू वास्तविकतासँग कुनै सरोकार राख्दैनन्।”
युक्रेन मामिलामा जर्मनीको भूमिकाबारे प्रश्न गर्दै उनले बर्लिनले कीभलाई राजनीतिक, सैन्य–प्राविधिक, आर्थिक र वैचारिक रूपमा व्यापक सहयोग गरिरहेको बताए। “युरोपेली मुलुकहरू आफैंलाई हानि हुने गरी पनि रुसलाई ‘रणनीतिक पराजय’ दिन लागिपरेका छन्, जसले गर्दा उनीहरू युक्रेन द्वन्द्वको एक पक्ष बनेका छन्,” नेचायेवले भने।
जर्मनीको बढ्दो सैन्यीकरण र रुसविरुद्ध युद्धको तयारीप्रति चिन्ता व्यक्त गर्दै उनले भने, “जर्मनीका केही राजनीतिज्ञहरूले युद्धका लागि तयार रहन आह्वान गरिरहेका छन्। यो पागलपनको पराकाष्ठा हो, जसविरुद्ध जर्मनीको आफ्नै इतिहासले प्रतिरोधात्मक क्षमता विकास गरेको हुनुपर्छ।”
आणविक हतियारको सवालमा राजदूतले जर्मनीले आणविक हतियार बोक्ने नाटोको ‘संयुक्त आणविक मिसन’ मा लामो समयदेखि सहभागिता जनाउँदै आएको स्मरण गराए। उनले भने, “जर्मनीले आफ्नै आणविक हतियार बनाउने दिशामा कदम चाल्यो भने त्यो आणविक अप्रसारसम्बन्धी अन्तर्राष्ट्रिय दायित्वको स्पष्ट उल्लङ्घन हुनेछ।”
राजदूत नेचायेवले रुस संवादका लागि सधैं तयार रहेको तर त्यो संवाद समानताको आधारमा हुनुपर्ने र रुसको मूलभूत हितलाई ध्यान दिनुपर्ने बताए। “तर पश्चिमा मुलुकहरूमा हाल त्यो तत्परता देखिँदैन,” उनले थपे।
