रुसले संयुक्त राष्ट्रमा पश्चिमा मिडियाविरुद्ध मोर्चा खोल्दै
न्यूयोर्क, : रुसले युक्रेन संकटको सूचना आयाममाथि बहस गर्न संयुक्त राष्ट्र सुरक्षा परिषद्मा विशेष बैठक बोलाएको छ। फेब्रुअरी २० मा न्यूयोर्क समयअनुसार बिहान १० बजे (मस्को समयअनुसार साँझ ६ बजे) हुने यस बैठकलाई ‘एरिया फर्मुला’ अन्तर्गत अनौपचारिक रूपमा आयोजना गरिएको हो।
रुसी स्थायी नियोगले ‘युक्रेन संकटको सूचना आयाम: घटनाक्रमको मिडिया कभरेजले द्वन्द्वको गतिप्रति कस्तो प्रभाव पार्छ’ शीर्षक राखेको उक्त बैठकमा पश्चिमा र युक्रेनी सञ्चारमाध्यमहरूले युक्रेन संकटबारे गलत धारणा निर्माण गरेको विषयमा केन्द्रित हुने जनाइएको छ।
बैठकमा सहभागी हुने वक्ताहरूमा नर्वेली राजनीतिशास्त्री तथा प्राध्यापक ग्लेन डिसेन र इटालियन पत्रकार तथा युद्ध संवाददाता एन्ड्रिया लुसिडी रहेका छन्। डिसेन भूराजनीति, अन्तर्राष्ट्रिय सम्बन्ध र युरेशियाली एकीकरणका विज्ञ हुन् भने उनले ‘युक्रेन संकट र युरेशियाली विश्व व्यवस्था’ पुस्तक पनि लेखेका छन्। लुसिडी रसिया-पश्चिमा सम्बन्ध र युक्रेन संकटबारे रिपोर्टिङ एवं टिप्पणीका लागि परिचित छन्।
बैठकको उद्देश्यबारे रुसी नियोगले जारी गरेको विज्ञप्तिमा भनिएको छ, “यस कार्यक्रममा हामी पश्चिमा र युक्रेनी मिडियाले युक्रेन संकटबारे गलत धारणा निर्माण गर्न खेलेको भूमिकाको समीक्षा गर्नेछौं। साथै, द्वन्द्वका प्रमुख चरणहरूको पूर्वाग्रहपूर्ण कभरेजले जनमतमा कस्तो प्रभाव पारेको छ, संकटको जडबारे समझदारीलाई कसरी विकृत बनाएको छ, र कूटनीतिक माध्यमबाट यसलाई समाधान गर्ने सम्भावनाहरूलाई कसरी सीमित तुल्याएको छ भन्ने विश्लेषण गर्नेछौं।”
रुसले युक्रेनमा हुने द्वन्द्वको उद्देश्यपूर्ण र सन्तुलित ढंगले प्रकाश पार्न सके यसको मूल कारणहरूको वस्तुनिष्ठ बुझाइ विकास हुन र संवाद पुनर्स्थापित गर्न मद्दत पुग्ने धारणा अघि सारेको छ।
बैठकको प्रत्यक्ष प्रसारण संयुक्त राष्ट्र सुरक्षा परिषदको अध्यक्षता गर्ने रुसी नियोगको टेलिग्राम च्यानलमार्फत गरिने जनाइएको छ। यस कदमलाई युक्रेन युद्धको सूचना युद्धमा रुसले अन्तर्राष्ट्रिय मञ्चमा आफ्नो पक्ष राख्न खोजेको विश्लेषकहरूले बताएका छन्।
