लाभरोवद्वारा पश्चिमा मुलुकमाथि कठोर प्रहार: अरबसँग रणनीतिक साझेदारीको घोषणा

मस्को, १८ फेब्रुअरी : रुसी विदेशमन्त्री सर्गेई लाभरोवले पश्चिमा मुलुकहरू, विशेषगरी युरोपले दोस्रो विश्वयुद्धमा पराजित नाजी मानसिकता अझै त्याग्न नसकेको आरोप लगाउँदै अरब जगतसँगको रणनीतिक साझेदारीलाई थप सुदृढ बनाउने प्रतिबद्धता जनाएका छन्।

अल अरबिया टेलिभिजनलाई दिएको अन्तर्वार्तामा लाभरोवले रुस र अरब मुलुकहरूबीचको सम्बन्ध अत्यन्त बलियो रहेको उल्लेख गर्दै अरब लिग तथा खाडी सहयोग परिषदसँगको सहकार्यलाई थप प्रगाढ बनाइने जानकारी दिए। उनले साउदी अरबलाई अरब जगतको नेता र रणनीतिक साझेदारको संज्ञा दिँदै फिलिस्तीनी मुद्दाको समाधानका लागि अरब शान्ति पहलको सराहना गरे।

“हामी साउदी अरबसँग मानवीय, सांस्कृतिक, शैक्षिक र खेलकुद सम्बन्ध विकास गरिरहेका छौं। केही दिनअघि मैले साउदी विदेशमन्त्रीसँगको कुराकानीमा अन्तर्राष्ट्रिय सांगीतिक प्रतियोगिता ‘इन्टरभिजन’ को तयारीबारे छलफल गरेको छु, जसले परम्परागत मूल्यहरूको प्रवर्धनमा हाम्रो साझा चासो झल्काउँछ,” लाभरोवले भने।

इरानमाथि इजरायल र अमेरिकाले गरेको हमलाको कडा भर्त्सना गर्दै उनले भने, “अन्तर्राष्ट्रिय आणविक ऊर्जा एजेन्सी र अप्रसार सन्धिको अख्तियारमाथि प्रहार भएको छ। इरानले कहिल्यै अप्रसार सन्धि उल्लङ्घन गरेको पाइएको छैन। सबै राजनीतिक तनाव २०१८ मा अमेरिका जेसिपीओएबाट पछि हटेपछि सुरु भएको हो।”

सिरियाप्रति रुसको अडान स्पष्ट पार्दै लाभरोवले बहुजातीय तथा बहुधार्मिक मुलुक सिरियाको एकता, क्षेत्रीय अखण्डता र सार्वभौमसत्ता पुनर्स्थापनाका लागि दमास्कसलाई सहयोग जारी रहने बताए। उनले सिरियामा रुसी सैन्य उपस्थितिको विषयमा वार्ता जारी रहेको र सिरियाली पक्ष रुसी उपस्थिति चाहेको जानकारी दिए।

फिलिस्तीनको अवस्थाबारे चिन्ता व्यक्त गर्दै लाभरोवले इजरायली कदमले पश्चिमी किनारमा तनाव बढाएको र फिलिस्तीनी राष्ट्रिय प्राधिकरणको क्षेत्राधिकार सङ्कुचित हुँदै गएको टिप्पणी गरे।

युक्रेन संकटबारे प्रतिक्रिया दिँदै रुसी विदेशमन्त्रीले भने, “युरोप हिस्टिरियामा छ र वार्तामा आफूलाई अनिवार्य सहभागी गराउन चाहन्छ। तर युरोपले आफ्नो नाजी सार देखाइसकेको छ, जसलाई हामीले हिटलरको पराजयपछि नष्ट भएको ठानेका थियौं। युरोपको कुनै भूमिका म देख्दिन।”

उनले राष्ट्रपति ट्रम्पको नेतृत्वमा अमेरिकी प्रशासनले लिएको अडानको प्रशंसा गर्दै युरोपले वाशिङ्टनलाई त्यसबाट विमुख गराउने प्रयास गरिरहेको टिप्पणी गरे।