मानवअधिकार सुशासनमा चीनको वैश्विक आह्वान

जेनेभा, २४ फेब्रुअरी – चिनियाँ विदेशमन्त्री एवं केन्द्रीय राजनीतिक ब्यूरो सदस्य वाङ यीले विश्वव्यापी मानवअधिकार सुशासन सुधार गर्न र अन्तर्राष्ट्रिय मानवअधिकार आन्दोलनको स्वस्थ विकास प्रवर्द्धन गर्न चीन सबै देशसँग सहकार्य गर्न तयार रहेको बताएका छन्।

संयुक्त राष्ट्र मानवअधिकार परिषदको ६१औँ सत्रको उच्चस्तरीय खण्डमा भिडियो लिङ्कमार्फत सम्बोधन गर्दै उनले यो कुरा बताएका हुन्।

अन्तर्राष्ट्रिय परिस्थिति जटिल र परस्पर गुँथिएको उल्लेख गर्दै उनले विश्वव्यापी मानवअधिकार सुशासन र दोस्रो विश्वयुद्धपछिको अन्तर्राष्ट्रिय व्यवस्था नयाँ समयको परीक्षणको सामना गरिरहेको बताए। चीनले प्रस्ताव गरेको ग्लोबल गभर्नेन्स इनिसियटिभलाई १५० भन्दा बढी देश र अन्तर्राष्ट्रिय संगठनबाट समर्थन प्राप्त भएको उनले जानकारी दिए।

विदेशमन्त्री वाङ यीले सार्वभौम समानताको रक्षा गर्न र विश्वव्यापी मानवअधिकार सुशासनको मूल उद्देश्य संरक्षण गर्न आग्रह गरे। कुनै पनि देशको विशिष्ट राष्ट्रिय परिस्थितिमा आधारित र त्यहाँको जनताको आवश्यकता अनुरूपको मानवअधिकार विकासको मार्गले मात्र व्यापक सम्भावना प्राप्त गर्न सक्ने उनको भनाइ थियो।

सबै पक्षले अन्तर्राष्ट्रिय कानूनको शासनको पालना गर्नुपर्ने र विश्वव्यापी मानवअधिकार सुशासनको जग बलियो बनाउनुपर्ने वाङ यीले बताए। उनले भने, “सबै देश मिलेर एकअर्काको आन्तरिक मामिलामा हस्तक्षेप नगर्ने सुनौलो नियमको पालना गर्नुपर्छ र मानवअधिकारको नाममा दोहोरो मापदण्ड सिर्जना गर्ने शब्द र कार्यलाई कडाइका साथ अस्वीकार गर्नुपर्छ।”

उनले बहुपक्षीयताको अभ्यास गर्न र विश्वव्यापी मानवअधिकार सुशासनका चुनौतीहरूको सामना गर्न आह्वान गरे। सबै देशले सबै प्रकारको उपनिवेशवाद वा जातीय विभेद अस्वीकार गर्नुपर्ने र कृत्रिम बौद्धिकता, जलवायु परिवर्तन तथा मानवअधिकारजस्ता उदीयमान मुद्दाहरूको उचित सम्बोधन गर्नुपर्ने उनको भनाइ थियो।

वाङ यीले विश्वव्यापी मानवअधिकार सुशासनमा जनता केन्द्रित दृष्टिकोणको वकालत गर्न र यसको अर्थ समृद्ध बनाउन सबै पक्षलाई आग्रह गरे। अन्तर्राष्ट्रिय समुदायले विकासको अधिकारलाई बहुपक्षीय मानवअधिकार एजेन्डामा अझ प्रमुख स्थानमा राख्नुपर्ने उनले बताए।

कार्योन्मुख दृष्टिकोण र विश्वव्यापी मानवअधिकार सुशासनको प्रभावकारिता अभिवृद्धिको आवश्यकता औंल्याउँदै वाङ यीले यस वैश्विक उद्देश्यका लागि सामूहिक रूपमा नयाँ खाका कोर्न चीन अन्तर्राष्ट्रिय समुदायसँग समन्वय गर्न तयार रहेको बताए।

सन् २०२६ चीनको १५औँ पञ्चवर्षीय योजनाको सुरूवात वर्ष भएको उल्लेख गर्दै उनले चीनले सम्पूर्ण प्रक्रियामा जनताको लोकतन्त्रलाई निरन्तर अघि बढाउने र चिनियाँ आधुनिकीकरणको उपलब्धि सबै जनतासम्म अझ न्यायोचित रूपमा पुर्याउने प्रतिबद्धता व्यक्त गरे।

उनले जोड दिँदै भने, “चीन साझा विकास र समृद्धि प्रवर्द्धन गर्न, अन्तर्राष्ट्रिय निष्पक्षता र न्यायको रक्षा गर्न, मानवजातिको साझा मूल्यहरूको संरक्षण गर्न र मानवअधिकार सभ्यताको प्रगतिले सम्पूर्ण विश्वलाई लाभान्वित गरोस् भन्ने उद्देश्यले साझा भविष्यको समुदाय निर्माण गर्न सबै देशसँग सहकार्य गर्न तयार छ।”