‘१५औं पञ्चवर्षीय योजना’ केन्द्रित रहने : सीपीपीसीसी राष्ट्रिय समितिको चौथो अधिवेशन

काठमाडौं, २ मार्च : चीनको शीर्ष राजनीतिक सल्लाहकार निकाय चिनियाँ जन राजनीतिक सल्लाहकार सम्मेलन (सीपीपीसीसी) को १४औं राष्ट्रिय समितिको चौथो अधिवेशनको मुख्य एजेन्डा सार्वजनिक भएको छ। आइतबार भएको सीपीपीसीसी स्थायी समितिको बैठकले मार्च ४ का लागि बेइजिङमा चौथो अधिवेशन आह्वान गर्ने निर्णय गरेसँगै सम्भावित एजेन्डा पनि सार्वजनिक गरिएको हो।

प्रस्तावित एजेन्डाअनुसार अधिवेशनमा सीपीपीसीसी स्थायी समितिको कार्यप्रतिवेदन र अघिल्लो अधिवेशनपछि राजनीतिक सल्लाहकारहरूले दिएका सुझावहरूको कार्यान्वयन अवस्थाबारे प्रतिवेदन पेस गरिने छ। अधिवेशनले उक्त प्रतिवेदनहरूमाथि छलफल गरी पारित गर्ने कार्यसूची रहेको छ।

यसैगरी, सीपीपीसीसी राष्ट्रिय समितिका सदस्यहरूले १४औं राष्ट्रिय जन कांग्रेस (एनपीसी) को चौथो अधिवेशनमा सहभागी भई सरकारको कार्यप्रतिवेदनलगायत महत्वपूर्ण दस्तावेजहरूमाथि छलफल गर्ने कार्यक्रम छ। प्रस्तावित एजेन्डाको सबैभन्दा महत्वपूर्ण पक्ष भनेको राष्ट्रिय आर्थिक तथा सामाजिक विकासको १५औं पञ्चवर्षीय योजना (सन् २०२६–२०३०) को मस्यौदामाथि हुने छलफल रहेको छ।

चीनको आगामी पाँच वर्षे विकास मार्गचित्रको रूपमा रहेको यो योजनाले चीनको आर्थिक, सामाजिक तथा प्राविधिक विकासको दिशा निर्धारण गर्ने विश्वास गरिएको छ। उक्त योजनामाथि सीपीपीसीसी सदस्यहरूले व्यापक छलफल गरी सुझाव दिने अपेक्षा गरिएको छ।

चीनको सबैभन्दा ठूलो राजनीतिक घटनाका रूपमा रहेको ‘दुई सत्र’ (सीपीपीसीसी र एनपीसीको वार्षिक अधिवेशन) अन्तर्गत सीपीपीसीसीको चौथो अधिवेशन आउँदो मार्च ४ देखि सुरु हुनेछ भने एनपीसीको अधिवेशन मार्च ५ मा सुरु हुने तालिका रहेको छ।