मध्यपूर्वमा युद्ध नभड्कियोस् : युरोपेली संघको ‘अत्यधिक चिन्ता’ र शान्तिको अपील
काठमाडौं, २ मार्च : युरोपेली संघ (ईयू) ले इरान र समग्र मध्यपूर्वको पछिल्लो घटनाक्रमलाई ‘अत्यधिक चिन्ताका साथ’ नियालिरहेको जनाउँदै सबै पक्षलाई अधिकतम संयमता अपनाउन आह्वान गरेको छ। युरोपेली संघकी विदेश नीति प्रमुख काजा कालासले आइतबार संघको तर्फबाट जारी गरेको वक्तव्यमा यी कुरा उल्लेख गरिएको छ।
वक्तव्यमा अधिकतम संयमता, नागरिकहरूको संरक्षण र संयुक्त राष्ट्र बडापत्रका सिद्धान्त तथा अन्तर्राष्ट्रिय मानवीय कानुनसहित अन्तर्राष्ट्रिय कानुनको पूर्ण पालना गर्न आग्रह गरिएको छ। मध्यपूर्व ‘कुनै पनि लामो युद्धबाट ठूलो क्षति बेहोर्ने’ चेतावनी वक्तव्यमा दिइएको छ।
युरोपेली संघले तनाव कम गर्न र इरानलाई आणविक हतियार प्राप्त गर्नबाट रोक्न दीर्घकालीन समाधान खोज्ने कूटनीतिक प्रयासमा योगदान पुर्याउँदै जाने उल्लेख गरेको छ। इरानले अन्तर्राष्ट्रिय आणविक ऊर्जा एजेन्सीसँगको पूर्ण सहकार्य र आणविक हतियार अप्रसार सन्धि तथा व्यापक सुरक्षा सम्झौताअन्तर्गत आफ्नो कानुनी दायित्वहरूको पालना गर्नु आवश्यक रहेकोमा पनि जोड दिइएको छ।
व्यापक असरको चेतावनी दिँदै वक्तव्यमा भनिएको छ, इरानमा भइरहेका घटनाक्रमहरू यस्तो बढोत्तरीमा पुग्नु हुँदैन जसले मध्यपूर्व, युरोप र यसभन्दा बाहिरका क्षेत्रलाई समेत आर्थिक क्षेत्रसहित अप्रत्याशित परिणामहरू निम्त्याउन सक्छ। वक्तव्यमा हर्मुज जलडमरूमध्यजस्ता महत्वपूर्ण जलमार्गहरू अवरुद्ध हुनबाट रोक्नुपर्ने पनि उल्लेख गरिएको छ।
कालासले आइतबार नै इरान र मध्यपूर्वभरि द्रुत रूपमा भइरहेको घटनाक्रमबारे छलफल गर्न युरोपेली संघका विदेश मन्त्रीहरूको आपतकालीन भिडियो सम्मेलन पनि बोलाएकी थिइन्।
