पर्वतमा भुषालको सुरुआती बाजी, मतगणनामा रास्वपाको अग्रता
पर्वत — प्रतिनिधिसभा सदस्य निर्वाचन अन्तर्गत पर्वत जिल्लामा जारी मतगणनाको प्रारम्भिक नतिजामा राष्ट्रिय स्वतन्त्र पार्टी (रास्वपा)का उम्मेदवार सागर भुषालले अग्रता लिएका छन्। सुरुआती गणनाले जिल्लाको राजनीतिक प्रतिस्पर्धामा नयाँ मोड ल्याएको संकेत गरेको छ।
फलेवास नगरपालिकाका वडा नम्बर ४ मुडिकुवा र वडा नम्बर ७ लिमिठानाको मतगणनाबाट सार्वजनिक भएको प्रारम्भिक परिणाम अनुसार भुषालले कुल ७ सय १६ मत प्राप्त गर्दै प्रतिस्पर्धी उम्मेदवारहरूभन्दा अगाडि देखिएका छन्। मुडिकुवाबाट उनले ४ सय ४५ मत प्राप्त गरेका छन् भने लिमिठानाबाट २ सय ७१ मत हात पारेका छन्।
उनका निकटतम प्रतिस्पर्धी नेपाली कांग्रेसका उम्मेदवार अर्जुनप्रसाद जोशीले ४ सय २६ मत प्राप्त गरेका छन्। त्यसैगरी नेकपा एमालेका पदम गिरीले ४ सय ५३ मत प्राप्त गरेका छन् भने नेकपाका उम्मेदवार मनहरि तिमिल्सिनाले १ सय २० मत पाएका छन्।
प्रारम्भिक मतपरिणामले पर्वतमा प्रतिस्पर्धा रोचक बन्दै गएको देखाएको छ। अझै अन्य वडाहरूको मतगणना जारी रहेकाले अन्तिम नतिजा कसको पक्षमा जान्छ भन्नेबारे स्पष्ट हुन बाँकी छ। निर्वाचन कार्यालयका अनुसार बाँकी क्षेत्रको मतगणना क्रमशः अगाडि बढाइँदै लगिनेछ र परिणाम क्रमशः सार्वजनिक गरिनेछ।
यसैबीच मतगणना स्थल आसपास सुरक्षा व्यवस्था कडा पारिएको छ भने दलका प्रतिनिधि र पर्यवेक्षकहरूको उपस्थितिमा गणना प्रक्रिया जारी रहेको छ।
