मध्यपूर्वमा १३ औं दिनको युद्ध: इरान र इजरायलबीच भीषण प्रत्याक्रमण

तेल अभिभ / मध्यपूर्वमा जारी भीषण युद्ध १३ औं दिनमा प्रवेश गरेको छ। इरानमाथि अमेरिका र इजरायलले थालेको सैन्य आक्रमणको जवाफमा इरान र हिजबुल्लाहले इजरायलमा ठूलो मिसाइल तथा रकेट हमला गरेका छन्। इजरायली सेनाले पनि बिहीबार बिहान इरानमाथि ‘व्यापक स्तरको आक्रमण’ सुरु गरेको जनाएको छ।

इजरायलभरि इरानबाट मिसाइल आक्रमणको चेतावनी दिँदै एयर साइरन बजेपछि यो प्रत्याक्रमण सुरु भएको हो। तेल अभिभका बासिन्दाहरूले ठूलो विस्फोटको आवाज सुनेको बताएका छन्। इजरायलको सरकारी स्वामित्वको कान टिभी समाचारका अनुसार क्षेप्यास्त्रका टुक्राहरू तेल अभिभका धेरै स्थानहरूमा खसेका छन्। इजरायली उद्धार सेवा म्यागेन डेभिड एडमले क्षेप्यास्त्र प्रहार वा टुक्रा खसेको स्थानहरूमा सम्भावित घाइतेहरूको खोजी गर्न आफ्नो टोली परिचालन गरेको जनाएको छ।

यी आक्रमणहरू बुधबार राति इजरायलले बेरुतको दक्षिणी उपनगरमा गरेको ठूलो हवाई आक्रमणपछि भएको हो। त्यसको जवाफमा हिजबुल्लाहले घण्टौंसम्म उत्तरी इजरायलमा रकेट ब्यारेज प्रहार गरेको थियो।

इजरायली सैन्य अधिकारीहरूका अनुसार हिजबुल्लाह लडाकूहरूले उत्तरी इजरायलमा करिब १०० रकेट र धेरै ड्रोन प्रहार गरेका थिए। त्यसैगरी इरानले पनि उत्तरी क्षेत्र लगायत अन्य क्षेत्रहरूमा धेरै मिसाइल प्रहार गरेको थियो। म्यागेन डेभिड एडमले प्रहार भएको र कम्तीमा दुई जना नागरिक सामान्य रूपमा घाइते भएको जनाएको छ।

यो लडाई अमेरिका-इजरायलको संयुक्त सैन्य आक्रमणबाट सुरु भएको क्षेत्रीय द्वन्द्व १३ औं दिनमा प्रवेश गरेको समयमा भएको हो। अहिलेसम्म यस युद्धमा हजारौंको ज्यान गइसकेको छ भने विश्व अर्थतन्त्र र ऊर्जा बजारमा ठूलो असर परेको छ। अन्तर्राष्ट्रिय समुदायले तत्काल युद्धविराम र वार्तामा फर्किन दबाब दिइरहेको बेला यो नयाँ प्रत्याक्रमणले शान्तिको सम्भावनामाथि फेरि प्रश्न चिन्ह लगाएको छ।