मध्यपूर्व युद्ध नफैलियोस् भन्ने गुटेरेस र एर्दोगानको साझा चिन्ता, वार्ताकै विकल्प नभएको निष्कर्ष
काठमाडौं – मध्यपूर्वमा जारी युद्ध अन्यत्र नफैलियोस् भन्नका लागि टर्कीले “गहन” कूटनीतिक प्रयास तीव्र पारेको छ। राष्ट्रपति रजेप तैयप एर्दोगानले बिहीबार युनाइटेड नेशन्सका महासचिव एन्टोनियो गुटेरेससँगको भेटपछि यो जानकारी दिएका हुन्।
अतातुर्क अन्तर्राष्ट्रिय शान्ति पुरस्कार गुटेरेसलाई प्रदान गर्दै एर्दोगानले भने, “यस चुनौतीपूर्ण समयमा महासचिव गुटेरेसको कूटनीति र वार्ताको आह्वान अत्यन्तै मूल्यवान छ।” उनले वर्तमान संकटको शान्तिपूर्ण समाधानका लागि टर्कीले “दृढता र धैर्यता” का साथ प्रयास जारी राख्ने र संयुक्त राष्ट्रसंघलाई थप समावेशी बनाउन पहल गरिरहने प्रतिबद्धता व्यक्त गरे। न्यायबिना कुनै विकास, शान्ति वा स्थिरता सम्भव नभएको उनले बताए।
गुटेरेसले आफ्नो सम्बोधनमा भने, “अमेरिका र इजरायलले गरेको व्यापक सैन्य आक्रमण र त्यसपछि इरानले धेरै देशहरूमा गरेको आक्रमण अन्तर्राष्ट्रिय शान्तिका लागि गम्भीर खतरा हो।” उनले सबै पक्षलाई तनाव कम गर्न, अन्तर्राष्ट्रिय कानुनको पालना गर्न, नागरिकको सुरक्षा गर्न र “तुरुन्तै वार्ताको टेबलमा फर्कन” आग्रह गरे। “तनाव न्यूनीकरण र वार्ता नै एकमात्र बाटो हो,” उनले जोड दिए।
बुधबार टर्की आइपुगेका गुटेरेसले विदेशमन्त्री हाकान फिदान र नागरिक समाजका प्रतिनिधिहरूसँग भेटवार्ता गरेका छन् भने अंकारामा शरणार्थी सहयोग गर्ने टर्की संस्थाहरूको पनि भ्रमण गरेका छन्।
