कुवेतमाथि ड्रोन आक्रमण : अन्तर्राष्ट्रिय विमानस्थल र आवासीय क्षेत्र निशानामा, विद्युत प्रणाली प्रभावित
कुवेत – कुवेत अन्तर्राष्ट्रिय विमानस्थल बिहीबार बिहानै धेरै ड्रोनको निशानामा परेको छ। नागरिक उड्डयन प्राधिकरणका अनुसार आक्रमणमा भौतिक क्षति भए तापनि कुनै मानवीय क्षति भएको छैन। कुवेत समाचार एजेन्सीका अनुसार नागरिक उड्डयन महानिर्देशनालयका प्रवक्ता अब्दुल्लाह अल-राजीले विमानस्थलको अवस्थालाई क्षेत्रीय संकट सुरु भएदेखि नै लागू गरिएको आपत्कालीन योजनाअन्तर्गत व्यवस्थापन गरिएको बताएका छन्।
यसैबीच, बिहीबार बिहानै भएको अर्को छुट्टै घटनामा दक्षिणी कुवेतको एक आवासीय भवनमा ड्रोन आक्रमण हुँदा दुई जना घाइते भएका छन् र भवनमा संरचनात्मक क्षति पुगेको छ। कुवेत रक्षा मन्त्रालयले जारी गरेको विज्ञप्तिमा यो जानकारी दिइएको हो। मन्त्रालयले ड्रोनको उद्गम स्थल खुलाएको छैन, तर यसअघि दिनभरि उत्तरी आकाशमा प्रवेश गरेका धेरै शत्रुतापूर्ण ड्रोनलाई कुवेतको हवाई प्रतिरक्षा प्रणालीले रोकेको जनाएको छ।
विद्युत्, पानी तथा नवीकरणीय ऊर्जा मन्त्रालयले यी आक्रमणले कुवेतको विद्युत् प्रणालीलाई समेत प्रभावित पारेको जनाएको छ। रोकिएका ड्रोनका भग्नावशेषले छ वटा प्रसारण लाइन अवरुद्ध हुँदा धेरै क्षेत्रमा आंशिक रूपमा विद्युत् आपूर्ति अवरुद्ध भएको छ।
यी घटनाहरू फेब्रुअरी २८ मा अमेरिका–इजरायलले इरानमाथि गरेको संयुक्त आक्रमणपछि बढेको क्षेत्रीय तनावका बीच भएका हुन्। इरानले जवाफी कारबाही स्वरूप मध्यपूर्वभर फैलिएका इजरायली र अमेरिकी लक्ष्यहरूमा क्षेप्यास्त्र तथा ड्रोन आक्रमण गरिरहेको छ।
