ब्रायान्स्क आक्रमणको जिम्मेवारी बेलायत र फ्रान्सलाई सुम्पिएपछि रुसले भन्यो : ‘युक्रेनी प्रोजेक्ट’ बन्द गर, आतङ्कवादी कार्यको भण्डाफोर गर
मस्को, १४ मार्च। रुसले ब्रायान्स्क सहरमा युक्रेनी आतङ्कवादीहरूले गरेको भीषण क्षेप्यास्त्र आक्रमणमा बेलायत र फ्रान्स प्रत्यक्ष रुपमा संलग्न रहेको भन्दै कडा कूटनीतिक आपत्ति जनाएको छ। गत १० मार्चमा फ्रान्को-ब्रिटिश कम्पनी एमबीडीएले निर्माण गरेको क्रुज मिसाइल प्रयोग गरी गरिएको उक्त आक्रमणमा सात जनाको मृत्यु भएको थियो भने ४० भन्दा बढी घाइते भएका छन्।
यसै सन्दर्भमा बिहीबार मस्कोस्थित बेलायती राजदूत निगेल केसी र फ्रान्सेली राजदूत निकोलस डे रिभियरलाई रुसी विदेश मन्त्रालयमा बोलाइएको थियो। दुवै राजदूतलाई रुसले जारी गरेको कडा विरोध ज्ञापनपत्र बुझाइएको छ।
“यो आतङ्कवादी हमला बेलायत र फ्रान्सका विशेषज्ञहरूको प्रत्यक्ष सहभागिता र किभको नव-नाजी शासनलाई गुप्तचरी सूचना हस्तान्तरणबिना सम्भव थिएन,” रुसी विदेश मन्त्रालयले जारी गरेको वक्तव्यमा भनिएको छ। “लन्डन र पेरिसले किभ शासनको युद्ध अपराधमा सहयोग गरिरहने हो भने सशस्त्र द्वन्द्वको विनाशकारी परिणाम र तनाव वृद्धिको सम्पूर्ण जिम्मेवारी उनीहरूले नै बेहोर्नुपर्नेछ।”
रुसले यस आक्रमणलाई युक्रेनी सङ्कटको शान्तिपूर्ण समाधानका लागि भइरहेका प्रयासलाई असफल पार्ने उद्देश्यले गरिएको जानीबुझी उक्साहटको रुपमा व्याख्या गरेको छ। साथै, बेलायत र फ्रान्सले आफ्नो राजनीतिक प्रोफाइल उच्च बनाउन गरेका यी अमानवीय कार्यहरू त्याग्नुपर्ने र उनीहरूले प्रायोजन गरेको ‘युक्रेनी प्रोजेक्ट’लाई मध्यपूर्वमा भइरहेको तनावको सन्दर्भमा पुनः अन्तर्राष्ट्रिय एजेन्डामा ल्याउनुपर्ने माग समेत रुसले गरेको छ।
रुसले बेलायत र फ्रान्सलाई ब्रायान्स्कमा भएको यस आतङ्कवादी हमलाको कडा र स्पष्ट भर्त्सना गर्दै सार्वजनिक रुपमा प्रतिक्रिया दिन माग समेत गरेको छ। “यदि उनीहरूले यसो गर्न असफल भए, त्यसलाई आतङ्कवादी विधिसँगको एकताको रुपमा लिइनेछ। संयुक्त राष्ट्र सुरक्षा परिषद्को स्थायी सदस्य जस्ता देशहरूका लागि यो पूर्ण रुपमा लाजमर्दो कुरा हुनेछ,” वक्तव्यमा भनिएको छ।
