अफगानिस्तानको भविष्य : चिनियाँ दूतको पाँच बुँदे अपिल, महिला अधिकार र आतंकवादमाथि कडा सन्देश

संयुक्त राष्ट्र संघ । अफगानिस्तानमा दिगो शान्ति, विकास र समृद्धिका लागि अफगान सरकार र अन्तर्राष्ट्रिय समुदायबीच निरन्तर संवाद र सहकार्य आवश्यक रहेको चीनले बताएको छ। अफगानिस्तानका लागि संयुक्त राष्ट्र सहायता मिसन (युनामा) को जनादेश थप गर्ने मस्यौदा प्रस्तावमा मतदानपछि सोमबार आफ्नो धारणा राख्दै चिनियाँ राजदूत फु कोङले पाँच बुँदे अपिल प्रस्तुत गरे।

चीनले युनामाको प्रयासको प्रशंसा गर्दै उसलाई आफ्नो जनादेश अझ प्रभावकारी रुपमा पूरा गर्न सहयोग गर्ने प्रतिबद्धता जनाएको छ। यस प्रस्तावको मस्यौदा तयार पार्ने प्रमुख राष्ट्र (पेनहोल्डर) का रुपमा चीनले सुरक्षा परिषद्का सदस्य राष्ट्रहरूको समर्थन र सहयोगको समेत प्रशंसा गरेको छ।

प्रस्तावले युनामाको कामप्रति दृढ समर्थन दोहोर्याएको उल्लेख गर्दै राजदूत फुले अफगान सरकारसँग अफगान महिला कर्मचारीहरूलाई संयुक्त राष्ट्र संघको परिसरमा प्रवेशमा लगाएको प्रतिबन्ध हटाउन र संयुक्त राष्ट्रका एजेन्सीहरूलाई आफ्नो कार्य सञ्चालनका लागि आवश्यक सहजीकरण गर्न आग्रह गरे।

चिनियाँ राजदूत फु कोङको पाँच बुँदे अपिल

राजदूत फुले अफगानिस्तानको वर्तमान अवस्था र भविष्यका लागि पाँचवटा प्रमुख विषयमा ध्यानाकर्षण गराएका छन् :

१. मानवीय सहायता र आर्थिक पुनरुत्थान:
प्रस्तावले अफगानिस्तानको आर्थिक र मानवीय अवस्थाप्रति गहिरो चिन्ता व्यक्त गरेको छ र मानवीय सहायता बलियो बनाउन तथा अफगानिस्तानको विकास आवश्यकतालाई समर्थन गर्न जोड दिएको छ। फुले परम्परागत सहायता दिने राष्ट्रहरू, विशेष गरी अफगानिस्तानप्रति ऐतिहासिक जिम्मेवारी बोक्ने देशहरूलाई चाँडोभन्दा चाँडो आफ्नो सहायता पुनः सुरु गर्न र बढाउन आग्रह गरे।

२. केन्द्रीय बैंकको सम्पत्ति फुकुवा:
उनले सम्बन्धित राष्ट्रहरूलाई अफगानिस्तानको केन्द्रीय बैंकको सम्पत्ति फ्रिज गर्ने निर्णय खारेज गरी फिर्ता गर्न पनि आह्वान गरे। यस दिशामा युनामाले ठूलो भूमिका खेल्न सक्ने उनको भनाइ थियो।

३. महिला अधिकारको रक्षा:
प्रस्तावले अफगानिस्तानमा महिला र बालिकाको आधारभूत अधिकारमाथि बढ्दो क्षरणप्रति गम्भीर चिन्ता व्यक्त गरेको छ। फुले महिलाहरूले शिक्षा, स्वास्थ्य सेवा, रोजगारी र सार्वजनिक जीवनमा समान अधिकार सुनिश्चित गर्न प्रतिबन्धात्मक नीतिहरू खारेज गर्न आवश्यक रहेको बताए।

४. आतंकवाद विरुद्ध कडा कदम:
प्रस्तावले अफगानिस्तानमा सञ्चालित आतंकवादी संगठनहरू अन्तर्राष्ट्रिय शान्ति र सुरक्षाको लागि खतरा बनेको र अफगान भू-भाग कुनै पनि प्रकारको आतंकवादी गतिविधिलाई आश्रय वा समर्थन गर्न प्रयोग गर्न नहुनेमा जोड दिएको छ। फुले अफगान सरकारलाई सुरक्षा परिषद्को प्रस्ताव अनुसार सबै आतंकवादी शक्तिहरू विरुद्ध लड्न थप कडा र प्रभावकारी कदम चाल्न आग्रह गरे।

५. युनामाको जनादेश पुनरावलोकन र भविष्य:
यसपटक सुरक्षा परिषद्ले युनामाको जनादेश एक वर्षको लागि नबढाई तीन महिनाका लागि मात्र थप गरेको सन्दर्भमा फुले यसलाई युनामा र अफगान जनताप्रतिको समर्थनमा कमजोरीको रुपमा नलिन आग्रह गरे। केही सदस्य राष्ट्रहरूले युनामाको जनादेशमा उपयुक्त समायोजन गर्न चाहेकोले गम्भीर छलफल र जिम्मेवार निर्णयका लागि पर्याप्त समय सुनिश्चित गर्न तीन महिनाको लागि मात्र जनादेश थप गरिएको उनले बताए। जनादेश समायोजनको लक्ष्य युनामाको भूमिकालाई कमजोर पार्नु नभई अफगानिस्तानको राजनीतिक समाधानलाई अगाडि बढाउन र स्थायित्व तथा विकासमा सहयोग पुर्याउन उसको भूमिकालाई सुदृढ बनाउनु रहेको फुले स्पष्ट पारे।

“यस लक्ष्य प्राप्तिका लागि चीन सबै पक्षहरूसँग मिलेर सक्रिय प्रयास गर्न तयार छ,” राजदूत फुले भने।