बुशेहर आक्रमण: आणविक प्रलयको छेउमा पुर्यायो इजरायल–अमेरिकी दुस्साहस

काठमाडौं : रुसी परराष्ट्र मन्त्रालयकी प्रवक्ता मारिया जाखारोभाले बुशेहर आणविक विद्युत केन्द्रमा भएको क्षेप्यास्त्र आक्रमणको कडा भर्त्सना गर्दै यसलाई ‘अविवेकी र सर्वथा अस्वीकार्य’ करार दिएकी छिन्। इरानको बुशेहर सहरमा रहेको उक्त आणविक केन्द्रको भित्री परिधिमा सञ्चालित विद्युत इकाइ नजिकै क्षेप्यास्त्र प्रहार गरिएको थियो।

जाखारोभाले आफ्नो वक्तव्यमा भनिन्, “हामी बुशेहर आणविक विद्युत केन्द्रको भित्री परिधिमा गरिएको अविवेकी र सर्वथा अस्वीकार्य क्षेप्यास्त्र आक्रमणको कडा भर्त्सना गर्दछौं, जुन सञ्चालित विद्युत इकाइबाट केही मिटरको दूरीमा गरिएको थियो।”

उनले इरानविरुद्ध आक्रामक सैन्य अभियान जारी राख्ने इजरायल र अमेरिकालाई पटक–पटक चेतावनी दिइसकिएको स्मरण गराउँदै भनिन्, “हामीले इरानविरुद्ध आफ्नो आक्रामक सैन्य अभियान जारी राख्ने इजरायल र अमेरिकालाई बारम्बार चेतावनी दिएका छौं कि विद्युत केन्द्रमा कार्यरत हाम्रा धेरै रुसी नागरिकहरूको जीवन र स्वास्थ्यलाई जोखिममा पार्नु सर्वथा अस्वीकार्य छ।”

रुसी प्रवक्ताले तेल अवीव र वासिङ्टनलाई आणविक पूर्वाधारमाथिको आक्रमण तत्काल रोक्न आग्रह गर्दै यसले सम्पूर्ण क्षेत्रमा विकिरण र वातावरणीय प्रलय निम्त्याउने खतरा सिर्जना गरेको चेतावनी दिइन्। “तेल अवीव र वासिङ्टनले आणविक पूर्वाधारमाथिको आफ्नो अविवेकी आक्रमण त्याग्नुपर्छ, जसले सम्पूर्ण क्षेत्रमा विकिरण र वातावरणीय प्रकोपको वास्तविक जोखिम सिर्जना गरेको छ।”

यस घटनाप्रति अन्तर्राष्ट्रिय आणविक ऊर्जा एजेन्सी (आईएईए) ले स्पष्ट रुपमा भर्त्सना गर्नुपर्नेमा जोड दिँदै जाखारोभाले भनिन्, “बुशेहर आणविक विद्युत केन्द्र आईएईएको सुरक्षाकवचमा सञ्चालित छ। हामी यस जघन्य घटनाको स्पष्ट भर्त्सना आईएईएबाट हुने अपेक्षा गर्दछौं। साथै, अन्तर्राष्ट्रिय समुदायका सबै जिम्मेवार र विवेकी सदस्यहरू, विशेषगरी यसको प्रत्यक्ष परिणाम भोग्नुपर्ने फारसको खाडीका राष्ट्रहरूले पनि उचित प्रतिक्रिया जनाउनेमा हामी विश्वस्त छौं।”

रुसले सबै पक्षलाई सचेत हुँदै तत्काल युद्धविराम र तनाव कम गर्न हरसम्भव प्रयास गर्न आग्रह गरेको छ। जाखारोभाले चेतावनी दिँदै भनिन्, “जारी शत्रुताका कारण सम्पूर्ण मध्यपूर्व क्षेत्रमा आणविक क्षेत्रलगायत अभूतपूर्व नकारात्मक परिणामहरू निम्तिने जोखिम छ। हामी सबै पक्षलाई होसमा आउन र तत्काल युद्धविराम तथा तनाव कम गर्न हरसम्भव प्रयास गर्न आह्वान गर्दछौं।”