सात दिन लगातार ला लिगा फुटबल, आज चार खेल हुँदै

म्याड्रिड — कोपा डेल रे फाइनलका कारण सप्ताहन्तमा भएको विश्रामपछि स्पेनिस ला लिगा फुटबल मध्यसात्ताको चरणसहित पुनः सुरु हुँदैछ। यो चरण र आगामी सप्ताहन्तको खेल तालिका मिल्दा स्पेनिस शीर्ष श्रेणीमा लगातार सात दिन फुटबल क्रियाकलाप हुनेछन्।

मङ्गलबार हुने चार खेलहरूले उपाधि होडदेखि युरोपेली प्रतियोगिता छनोट र रेलिगेसनविरुद्धको सङ्घर्षसम्म तालिकाका दुवै छेउका लागि महत्त्वपूर्ण अर्थ राख्नेछन्।

उपाधि होड: रियाल मड्रिडलाई जित्नैपर्ने दबाब

गत साता च्याम्पियन्स लिगमा बायर्न म्युनिखसँगको निराशाजनक बहिर्गमनपछि रियाल मड्रिड पहिलोपटक सान्टियागो बर्नाबेउ रङ्गशालामा फर्किंदैछ। डिपोर्टिभो अलाभेसविरुद्धको खेलमा रियाल मड्रिड शीर्ष स्थानको बार्सिलोनाभन्दा ९ अङ्कले पछि रहेको छ र बाँकी खेलबाट २१ अङ्क जोड्न सकिने अवस्था छ। यस्तोमा जितबाहेकको नतिजाले क्लबको पातलो उपाधि आशा लगभग समाप्त हुनेछ।

प्रशिक्षक अल्भारो आर्बेलोआसँग पेटको सङ्क्रमणका कारण बाहिर रहेका डिफेन्डर राउल असेन्सियोबाहेक लगभग पूरै टोली उपलब्ध छ। तथापि, त्रुटिको सम्भावना न्यून रहेको र घरेलु समर्थकको अपेक्षा उच्च रहेको यस खेलमा उनको टोलीले तीव्रता र स्पष्ट आक्रमणको सङ्केत देखाउनुपर्नेछ।

अलाभेस भने रेलिगेसन क्षेत्रभन्दा १ अङ्क र एक स्थान माथि रहेर यो खेलमा आउँदैछ। यदि उसले हार बेहोर्यो र एल्चेले एट्लेटिको मड्रिडलाई हरायो भने अलाभेस पुछारको तीनभित्र धकेलिन सक्छ। किकी सान्चेज फ्लोरेसले प्रशिक्षण सम्हालेयता भिटोरियास्थित यो टोली चार खेलदेखि अपराजित छ, जसमा रियाल सोसिडाडसँगको ३–३ को बराबरी पनि समावेश छ। फरवार्ड टोनी मार्टिनेज र लुकास बोये अलाभेसका लागि खतरा बन्न सक्छन्।

अन्य खेल: रेलिगेसन सङ्घर्षमा महत्त्वपूर्ण भिडन्त

दिनको पहिलो खेलमा एथ्लेटिक क्लबले ओसासुनालाई आतिथ्यता गर्नेछ। रेलिगेसन क्षेत्रभन्दा ६ अङ्कले माथि रहेको घरेलु टोलीका लागि यो महत्त्वपूर्ण खेल हो। क्लब अध्यक्ष जोन उरियार्ते निर्विरोध अर्को चार वर्षे कार्यकालका लागि पुनः निर्वाचित भएपछि डाइरेक्टर बक्समा फर्किंदैछन्। यता, एथ्लेटिकले गत डिसेम्बर ६ यता लगातार १५ लिग खेलमा ‘क्लिन सिट’ (गोलरहित जित) राख्न नसकेको अभिशाप तोड्न र निको विलियम्सलाई पुरानै लयमा फर्काउन खोज्नेछ।

त्यसैगरी, रेलिगेसन नजिकका टोलीबीचको अर्को भिडन्तमा मायोर्काले भ्यालेन्सियाको आतिथ्यता गर्नेछ। लगातार दुई जितले मायोर्कालाई एल्चेभन्दा २ अङ्कले माथि १५औं स्थानमा उकासेको छ भने भ्यालेन्सिया लगातार दुई हारसहित आफ्नो प्रतिद्वन्द्वीभन्दा १ अङ्कले माथि छ। मायोर्काले २१ गोल गरिसकेका स्ट्राइकर भेदात मुरिकी र विङ्गर जान भिर्गिलीबाट आक्रामक धारको अपेक्षा गर्नेछ।

मङ्गलबारको अन्तिम खेलमा जिरोनाले रियाल बेटिसको सामना गर्नेछ। घरेलु टोली रेलिगेसनको चिन्ता हटाउन आवश्यक अङ्क जोड्न चाहन्छ। जिरोना सिजनको बाँकी खेलका लागि स्ट्राइकर भ्लादिस्लाभ भानातबिना मैदान उत्रनेछ भने एबेल रुइज पनि ह्याम्स्ट्रिङ चोटका कारण मैदान बाहिर छन्।

यता, बेटिस लिगमा लगातार सात खेलदेखि जितविहीन छ भने युरोपा लिगमा स्पोर्टिङ ब्रागासँग स्तब्ध बहिर्गमनको सामना गरेको थियो, जहाँ उसले २–० को अग्रता गुमाउँदै ४–२ को हार बेहोरेको थियो। उक्त नतिजापछि प्रशिक्षक म्यानुएल पेलेग्रिनी झन्डै ६ वर्षको अवधिमा पहिलोपटक चौतर्फी दबाबमा परेका छन्।

लिग खेल तालिकाअनुसार बुधबार बार्सिलोनाले सेल्टा भिगोको आतिथ्यता गर्नेछ भने सोही दिन तीन र बिहीबार थप तीन खेल हुनेछन्।