इन्डोनेसियामा डढेलोबाट विस्थापित तीन ओराङउटानको उद्धार
ड्रागन मिडिया समाचार कक्ष
इन्डोनेसियाको पश्चिम कालिमान्तान प्रान्तमा वन तथा जमिनमा लागेको डढेलोका कारण प्राकृतिक बासस्थानबाट बाहिरिएका तीन ओराङउटानको उद्धार गरिएको छ। पछिल्लो उद्धारसँगै डढेलोका कारण सुरक्षित स्थानमा सारिएका ओराङउटानको संख्या १८ पुगेको स्थानीय संरक्षण निकायले जनाएको छ।
पश्चिम कालिमान्तान प्राकृतिक श्रोत संरक्षण निकायका प्रमुख मुरलान डामेरिया पानेका अनुसार केटापाङ जिल्लाका पेन्जालान र पादु बन्जार गाउँबाट दुई अलग कारवाहीमार्फत तीन ओराङउटानलाई उद्धार गरिएको हो। उनीहरू स्थानीय बासिन्दाका बगान क्षेत्रमा फेला परेका थिए।
इन्डोनेसियन नेचर रिह्याबिलिटेसन इनिसिएटिभ फाउन्डेसनकी कार्यकारी निर्देशक कार्मेले ल्यानो सान्चेजका अनुसार आमा र बच्चा रहेका मामा पेन्जा र पेन्जा अत्यन्त दुब्ला र कमजोर अवस्थामा फेला परेका थिए। मामा पेन्जामा गम्भीर निर्जलीकरण, रक्तअल्पता, दुवै खुट्टामा डढेको घाउ र दाँतमा क्षति देखिएको छ।
कुम्बाङ नामक भाले ओराङउटानमा श्वासप्रश्वाससम्बन्धी समस्या, चोटपटक र पासोका निशान देखिएका छन्। उसको दायाँ हातमा गोली हुन सक्ने शंकास्पद बाह्य वस्तुसमेत फेला परेको छ। कुम्बाङलाई यसअघि पनि यही क्षेत्रबाट उद्धार गरेर सन् २०२२ मा पुनः जंगलमा छाडिएको थियो।
तीनै ओराङउटानको अहिले केटापाङस्थित उद्धार केन्द्रमा उपचार भइरहेको छ। उनीहरू फेला परेको क्षेत्र गुनुङ पालुङ राष्ट्रिय निकुञ्जको बासस्थान तथा मध्यवर्ती क्षेत्रमा पर्छ, जुन पश्चिम कालिमान्तानमा ओराङउटान संरक्षणका लागि महत्वपूर्ण क्षेत्र मानिन्छ।
