बाढी प्रभावित क्षेत्रमा चीनले अघि सार्दै ‘साना तर सुन्दर’ पुनर्निर्माण परियोजना
ड्रागन मिडिया सम्वाददाता
भोटेकोशी र त्रिशूली नदीमा आएको विनाशकारी बाढीबाट प्रभावित क्षेत्रमा चीनले स्थानीय जनजीविका सुधार र दीर्घकालीन पुनर्निर्माणलाई लक्षित गर्दै ‘साना तर सुन्दर’ परियोजना अघि बढाउने भएको छ। नेपालका लागि चिनियाँ राजदूत चाङ माओमिङले कायममुकायम प्रधानमन्त्री तथा अर्थमन्त्री स्वर्णिम वाग्लेसँगको भेटवार्तामा चिनियाँ सहयोगलाई तत्काल राहतबाट प्रभावित समुदायको पुनर्स्थापना र विकासतर्फ विस्तार गर्ने योजना प्रस्तुत गरेका हुन्।
चिनियाँ राजदूतावासका अनुसार प्रस्तावित सहयोगअन्तर्गत ‘जीवन्त गाउँ’, ‘खुशी समुदाय’ र ‘उज्यालो भविष्य’ लगायतका कार्यक्रम सञ्चालन गरिनेछन्। यी परियोजनाले बाढीबाट प्रभावित बस्तीमा स्थानीय आवश्यकता सम्बोधन गर्दै नागरिकको जीवनस्तर सुधार र समुदायको पुनर्निर्माणमा योगदान पुर्याउने अपेक्षा गरिएको छ। परियोजनाको लागत, कार्यान्वयन हुने स्थान र समयसीमासम्बन्धी विस्तृत विवरण भने सार्वजनिक गरिएको छैन।
भदौ १० गतेको विनाशकारी बाढीपछि चीनले नेपाललाई उद्धार, राहत र पुनःस्थापनाका विभिन्न चरणमा सहयोग उपलब्ध गराउँदै आएको छ। राजदूत चाङले विपदपछिको तत्काल मानवीय सहयोगसँगै प्रभावित क्षेत्रका नागरिकको दीर्घकालीन जनजीविका पुनर्स्थापित गर्न आवश्यक कार्यक्रमलाई निरन्तरता दिने जानकारी गराएका छन्।
भेटवार्तामा कायममुकायम प्रधानमन्त्री वाग्लेले विपदका बेला चीनले उपलब्ध गराएको सहयोगप्रति धन्यवाद व्यक्त गरेका छन्। उनले यसअघि सञ्चालन भएका तथा आगामी दिनमा अघि बढाउन प्रस्ताव गरिएका जनजीविकासम्बन्धी परियोजनाको प्रशंसा गर्दै पुनर्निर्माणमा निरन्तर सहकार्यको अपेक्षा व्यक्त गरेको जनाइएको छ।
वाग्लेले नेपाल चीनसँग विभिन्न क्षेत्रमा सहकार्य थप विस्तार गर्न इच्छुक रहेको पनि बताएका छन्। हालैको बाढीले सडक, पुल, जलविद्युत आयोजना र स्थानीय बस्तीमा पुर्याएको क्षतिपछि प्रभावित समुदायको जनजीविका पुनर्स्थापना तथा आधारभूत पूर्वाधार पुनर्निर्माण महत्त्वपूर्ण प्राथमिकता बनेका छन्।
चीनले अघि सारेका ‘साना तर सुन्दर’ परियोजनाको अवधारणा स्थानीय समुदायमा प्रत्यक्ष प्रभाव पार्ने, आवश्यकता केन्द्रित र कार्यान्वयन गर्न सकिने कार्यक्रमसँग सम्बन्धित छ। प्रस्तावित परियोजनाको विस्तृत स्वरूप निर्धारण भएपछि बाढी प्रभावित क्षेत्रमा तिनको योगदान र कार्यान्वयनको दायरा थप स्पष्ट हुने अपेक्षा गरिएको छ।
