महिला कबड्डी टोलीको लगातार दोस्रो एसियाली खेलकुद पदक सुनिश्चित
ड्रागन मिडिया सम्वाददाता
नेपाली महिला कबड्डी टोलीले २०औँ एसियाली खेलकुदमा लगातार दोस्रो पदक सुनिश्चित गरेको छ। जापानको नागोयामा बिहीबार भएको समूह चरणको अन्तिम खेलमा श्रीलंकालाई ३४–२५ अंकले हराउँदै नेपाल सेमिफाइनल पुगेको हो। प्रतियोगिताको प्रावधानअनुसार सेमिफाइनल पुग्ने टोलीले कम्तीमा कांस्य पदक पाउँछ।
नेपाल समूह ‘बी’ को उपविजेता बनेर सेमिफाइनल पुगेको हो। अब फाइनल प्रवेशका लागि उसले समूह ‘ए’ विजेता भारतसँग खेल्नेछ। भारतले समूह चरणका तीनवटै खेल जितेको छ। अर्को सेमिफाइनलमा चाइनिज ताइपेई र इरान भिड्नेछन्।
कप्तान मानमती विष्टले पदक सुनिश्चित भए पनि टोली सेमिफाइनल जित्ने लक्ष्यसहित मैदानमा उत्रने बताएकी छन्। नेपालले यसअघि सन् २०२३ को हाङचाउ एसियाली खेलकुदमा महिला कबड्डीतर्फ कांस्य पदक जितेको थियो। श्रीलंकाविरुद्धको खेलमा नेपालले पहिलो हाफ १९–१३ र दोस्रो हाफ १५–१२ अंकले आफ्नो पक्षमा पारेको थियो।
यसैबीच, नेपाली पुरुष कबड्डी टोलीले समूह चरणको अन्तिम खेलमा मलेसियालाई ७३–५२ अंकले हराउँदै प्रतियोगिताबाट बिदा लिएको छ। अघिल्ला तीन खेल हारेको पुरुष टोली सेमिफाइनलको दौडबाट बाहिरिसकेको थियो।
