न्युयोर्कमा नेपालले हिमाल र टापु मुलुकबीच जलवायु सहकार्यको आह्वान गर्यो
ड्रागन मिडिया समाचार कक्ष
नेपालले जलवायुजन्य विपद्को सामना गर्न हिमाली र टापु मुलुकबीच सहकार्य विस्तार गर्न आह्वान गरेको छ। परराष्ट्रमन्त्री शिशिर खनालको नेतृत्वमा शनिबार न्युयोर्कस्थित संयुक्त राष्ट्रसंघको मुख्यालयमा ‘सगरमाथादेखि सागरसम्म : जलवायु उत्थानशील भविष्यका लागि आह्वान’ विषयमा विशेष कार्यक्रम आयोजना गरिएको थियो। कार्यक्रममा भुटान, माल्दिभ्स, न्युजिल्यान्ड, सामोआ र ताजकिस्तानका प्रतिनिधिसहित राष्ट्रसंघका अधिकारी सहभागी थिए।
खनालले हिमनदीबाट बग्ने पानी सीमापारि हुँदै समुद्रसम्म पुग्ने भएकाले पर्वतीय र टापु मुलुकका जलवायु जोखिमलाई अलग समस्याका रूपमा हेर्न नसकिने बताए। उनले सुदृढ पूर्वसूचना प्रणाली, जलवायु उत्थानशील पूर्वाधार र वैज्ञानिक सहकार्यमा लगानी बढाउन आग्रह गरे। विकासशील देशलाई जलवायु वित्त तथा प्रविधिमा सहज पहुँच र हानिनोक्सानीका लागि उपलब्ध सहयोगलाई पर्याप्त तथा पहुँचयोग्य बनाउनुपर्नेमा पनि उनले जोड दिए।
भोटेकोशीमा आएको विनाशकारी बाढीको एक महिनापछि आयोजित कार्यक्रममा विपद्अघि नै जोखिम पहिचान गर्ने र नागरिकलाई समयमै सुरक्षित स्थानमा सार्ने क्षमताबारे छलफल भयो। सहभागीहरूले उपग्रहबाट प्राप्त तस्बिर, जोखिमको वैज्ञानिक अध्ययन र पूर्वसूचना प्रणालीले सम्भावित क्षति घटाउन सहयोग गर्न सक्ने बताए। विपद्पछिको राहतसँगै जोखिममा रहेका देशको आफ्नै पूर्वतयारी क्षमता बढाउनुपर्ने धारणा पनि कार्यक्रममा उठ्यो।
माल्दिभ्सका प्रतिनिधिले हिमाली क्षेत्रमा हुने परिवर्तनको प्रभाव नदी हुँदै तटीय क्षेत्रमा पुग्ने बताए। ताजकिस्तानले आफ्ना हिमनदीमा आएको क्षयबारे जानकारी गरायो भने न्युजिल्यान्डले हिमाली र टापु मुलुकलाई एउटै मञ्चमा ल्याउने नेपालको पहलको प्रशंसा गर्यो। चिनियाँ प्रतिनिधिले पनि नेपाल र चीनलाई पहाड तथा नदीले जोडेको उल्लेख गरे।
खनालले विश्वव्यापी जलवायु वार्तामा हिमाली क्षेत्रलाई बढी प्राथमिकता दिन आग्रह गरे। उनले नेपालले शुरु गरेको सगरमाथा संवादको अर्को संस्करण आगामी वर्ष आयोजना गर्ने जानकारी दिँदै ‘सगरमाथादेखि सागरसम्म’ पहललाई सरकार, वैज्ञानिक, वित्तीय संस्था र जोखिममा रहेका समुदायबीच सहकार्यको मञ्चका रूपमा अघि बढाउने बताए।
