पूर्वप्रधानन्यायाधीश जबरालाई पक्राउ गर्नुको कारण अझै अस्पष्ट
ड्रागन मिडिया सम्वाददाता
पूर्वप्रधानन्यायाधीश चोलेन्द्र शम्शेर जबरालाई प्रहरीले शनिबार राति महाराजगञ्जस्थित निवासबाट नियन्त्रणमा लिएको छ। आइतबार बिहानसम्म प्रहरीले उनलाई पक्राउ गर्नुको कानुनी आधार र उनीमाथि लागेको आरोप सार्वजनिक गरेको छैन।
जबराका भाइ प्रभुशम्शेर जबराले अनलाइनखबरसँग कुरा गर्दै प्रहरीले ‘जेनजीहरूबाट तपाईंलाई खतरा छ’ भनेर दाइलाई लगेको बताएका छन्। यो परिवारलाई प्रहरीले दिएको भनिएको कारण हो। प्रहरीले भने त्यही कारण पुष्टि गरेको छैन।
अनलाइनखबरले अदालतसम्बद्ध स्रोतलाई उद्धृत गर्दै पक्राउअघि अदालतबाट पक्राउ पुर्जी नलिइएको जनाएको छ। जरुरी पक्राउको अनुमति लिइएको हो कि होइन भन्ने पनि स्पष्ट भएको छैन। जबरालाई काठमाडौं उपत्यका अपराध अनुसन्धान कार्यालय, टेकुमा राखिएको विवरण सार्वजनिक भएको छ।
कुनै व्यक्तिमाथि सुरक्षा खतरा रहेको जानकारी र उसलाई अपराधको आरोपमा पक्राउ गर्ने आधार फरक विषय हुन्। जबरालाई सुरक्षाका लागि नियन्त्रणमा लिइएको हो वा अनुसन्धानका लागि पक्राउ गरिएको हो भन्ने स्पष्ट पार्ने जिम्मेवारी प्रहरीको हो। पक्राउसम्बन्धी कागजात र कानुनी आधार सार्वजनिक भएपछि मात्रै कारवाहीको प्रकृति र वैधताबारे ठोस निष्कर्ष निकाल्न सकिन्छ।
