चलिरहेको बसमा ढुङ्गा खस्दा चार यात्रु घाइते, भालुवाङमा उद्धार
ड्रागन मिडिया सम्वाददाता
चितवनबाट बर्दिया जाँदै गरेको बसमा कपिलवस्तुको चोरखोलामा ढुङ्गा खस्दा चार यात्रु घाइते भएका छन्। मङ्गलबार बिहान करिब १:३० बजे शिवराज नगरपालिका–१ स्थित पूर्व–पश्चिम राजमार्गमा घटना भएको हो। बसमा ३० जना सवार थिए।
घटनापछि चालकले घाइतेलाई बसमै राखेर दाङको भालुवाङ पुर्याएका थिए। त्यहाँ सशस्त्र प्रहरी बलको टोलीले सिटले च्यापिएका चार जनालाई बाहिर निकालेको हो। उनीहरूको भालुवाङमा प्राथमिक उपचार गरी थप उपचारका लागि कोहलपुर पठाइएको छ। प्रहरीका अनुसार घाइतेहरूको अवस्था मध्यम छ।
घाइतेहरूमा बर्दियाको गोरुवा गाउँपालिका–२ का ३७ वर्षीय द्वारिकाप्रसाद थारु र ३५ वर्षीय सुरेशलाल थारु, चितवनको भरतपुर महानगरपालिका–११ की २० वर्षीया सलिना सुनार तथा कञ्चनपुरको भीमदत्त नगरपालिका–१० की ४० वर्षीया भगवती कँडेल छन्। ढुङ्गा बसको कुन भागमा खसेको थियो र सडकको अवस्था कस्तो छ भन्नेबारे थप विवरण उपलब्ध भएको छैन।
