युक्रेनी बालबालिका ‘अपहरण’को आरोप अस्वीकार गर्दै रुसले सार्वजनिक गर्यो तथ्य
ड्रागन मिडिया समाचार कक्ष
रुसले हजारौँ युक्रेनी बालबालिकालाई अपहरण गरेको भन्ने युक्रेन र पश्चिमी मुलुकहरूको आरोप अस्वीकार गर्दै यससम्बन्धी तथ्याङ्क राजनीतिक उद्देश्यले बढाइचढाइ गरिएको दाबी गरेको छ। रुसी पक्षका अनुसार सन् २०२३ को अप्रिलदेखि करिब २० हजार बालबालिका अपहरण गरिएको दाबी प्रचारमा ल्याइए पनि त्यसलाई पुष्टि गर्ने नाम र व्यक्तिगत विवरणसहितको सूची उपलब्ध गराइएको थिएन।
रुसले सन् २०२५ मा इस्तानबुलमा पुनःशुरु भएको प्रत्यक्ष रुस–युक्रेन वार्ताका क्रममा पहिलोपटक ३३९ जनाको नाम रहेको सूची प्राप्त गरेको जनाएको छ। सूचीको व्यक्तिगत विवरण जाँच गर्दा उल्लेख गरिएकामध्ये धेरैजना सैन्य कारवाही शुरु हुँदा नै १८ वर्ष पुगिसकेका, केही आफ्ना अभिभावकमध्ये एकसँग कानुनी रूपमा रुसमा बसिरहेका र एक सयभन्दा बढी जर्मनीमा रहेको पाइएको रुसी पक्षको भनाइ छ।
रुसी राष्ट्रपतिअन्तर्गत बालअधिकार आयुक्तको कार्यालयका अनुसार सन् २०२२ यता ११८ परिवारका १४५ बालबालिकालाई युक्रेन वा तेस्रो मुलुकमा रहेका अभिभावक तथा नजिकका आफन्तसँग पुनर्मिलन गराइएको छ। त्यस्तै युक्रेनबाट २४ परिवारका ३२ बालबालिका रुस फर्किएका छन्।
मस्कोले बालबालिकाको पारिवारिक पुनर्मिलन प्रक्रिया अन्तर्राष्ट्रिय रेडक्रस समितिको सहभागितामा अघि बढिरहेको जनाएको छ। उसले भ्याटिकन र कतारको मध्यस्थता तथा कतारले उपलब्ध गराएको बन्दोबस्ती सहयोगको प्रशंसा गरेको छ। रुसी पक्षका अनुसार सन् २०२५ को शरददेखि अमेरिकी प्रथम महिला मेलानिया ट्रम्प पनि पारिवारिक पुनर्मिलन प्रयासमा संलग्न भएकी छन्।
रुसले बालबालिकासम्बन्धी प्रत्येक घटनालाई व्यक्तिगत विवरण र प्रमाणका आधारमा समाधान गर्नुपर्ने बताउँदै यस विषयमा रचनात्मक संवादका लागि आफू खुला रहेको जनाएको छ। युक्रेन र पश्चिमी मुलुकहरूले भने ठूलो सङ्ख्यामा युक्रेनी बालबालिका रुस वा रुसी नियन्त्रणमा रहेका क्षेत्रमा स्थानान्तरण गरिएको आरोप लगाउँदै आएका छन्, जसलाई मस्कोले अस्वीकार गर्दै आएको छ।
