जापानका नयाँ प्रतिबन्धले द्विपक्षीय सम्बन्ध थप कमजोर बनाउने रुसको भनाइ
ड्रागन मिडिया समाचार कक्ष
रुसी विदेश मन्त्रालयकी प्रवक्ता मारिया जाखारोभाले जापानले रुसमाथि लगाएको नयाँ प्रतिबन्धले दुई देशबीचको सम्बन्ध थप कमजोर बनाउने बताएकी छन्। अक्टोबर ५ मा जारी वक्तव्यमा उनले टोकियोका पछिल्ला कदमलाई अमित्रवत र रुसबाट उक्साहट नभएको भन्दै आलोचना गरेकी हुन्।
जाखारोभाका अनुसार जापानले अक्टोबर २ मा रुसविरुद्ध प्रतिबन्धको २७औँ चरण घोषणा गरेको थियो। त्यसमा ३३ रुसी कानुनी संस्था, नौ व्यक्ति र विदेशका केही कम्पनी समेटिएका छन्। पहिलोपटक समुद्री ढुवानीमाथिका प्रतिबन्ध पनि यसमा समावेश गरिएको उनले बताइन्।
युक्रेनसम्बन्धी वर्तमान अन्तर्राष्ट्रिय अवस्थालाई आधार बनाएर प्रतिबन्धलाई अन्तर्राष्ट्रिय शान्ति स्थापनाको प्रयासमा योगदानका रूपमा प्रस्तुत गर्नु जापानी सरकारको औचित्य पुष्टि गर्ने असफल प्रयास भएको जाखारोभाको भनाइ छ। उनले टोकियोको विदेश नीति स्वतन्त्र नभई युरो–एटलान्टिक क्षेत्रका साझेदारसँगको अन्धानुकरणमा आधारित रहेको आरोप लगाइन्।
जाखारोभाले जापानका प्रधानमन्त्री साने ताकाइची नेतृत्वको सरकारले युक्रेनमा दीर्घकालीन शान्ति स्थापनाको सम्भावनालाई अझ टाढा धकेलिरहेको पनि बताइन्। उनका अनुसार जापानका कदमले अन्तर्राष्ट्रिय कानुन र द्विपक्षीय सम्झौताप्रतिको बेवास्ता देखाउँछन्।
उनले सन् १९५७ को वाणिज्य सन्धि अझै कायम रहेको उल्लेख गर्दै त्यसले व्यापारीक जहाज र तिनका चालक दललाई तेस्रो मुलुकका जहाज तथा चालक दललाई दिइनेभन्दा कम अनुकूल व्यवहार नगर्ने प्रत्याभूति गरेको बताइन्।
जाखारोभाले जापानका अमित्रवत कदमको जवाफमा रुसले अनुपातिक प्रतिकारात्मक उपाय अपनाउने र ती मुख्यतः जापानका हितका क्षेत्रमा केन्द्रित हुने चेतावनी दिएकी छन्।
