बुढीगण्डकीको आकस्मिक बाढी: चार जना सम्पर्कविहीन, पुल र जलविद्युत् आयोजनामा क्षति
ड्रागन मिडिया सम्वाददाता
गोरखाको चुमनुब्री गाउँपालिकामा आइतबार बिहान आएको बुढीगण्डकीको आकस्मिक बाढीले तटीय बस्ती, पुल र जलविद्युत् आयोजनामा क्षति पुर्याएको छ। चुमनुब्री–६ चुम्चेतस्थित उङ्गिलुङ खोला किनारको गोठमा बस्दै आएका चार जना स्थानीय सम्पर्कविहीन छन्। उनीहरूको खोजी भइरहेको स्थानीयले बताएका छन्। हालसम्म मानवीय क्षति भएको पुष्टि भएको छैन।
बाढीले चुमनुब्री–३ न्याकचेतबाट सिर्दिबास जोड्ने पुरानो झोलुङ्गे पुल, धार्चे–५ माछाखोलाबाट केरौँजा जोड्ने झोलुङ्गे पुल र आरुघाटस्थित फलामे पुल बगाएको छ। आरुघाटको पुलले धादिङ र गोरखा जोड्थ्यो। चुमनुब्री–३ सल्लेरीमा निर्माणाधीन ३४१ मेगावाटको बुढीगण्डकी जलविद्युत् आयोजनाको क्याम्प र केही उपकरण पनि बाढीले बगाएको छ।
घरमा भएको क्षतिको विवरण अझै एकिन भएको छैन। गाउँपालिका उपाध्यक्ष लक्ष्मी गुरुङका अनुसार पैयू र बगर गाउँका ३५ घर बगेका छन्। अन्य प्रारम्भिक विवरणमा सल्लेरी, पैयू र जगत् बगरमा १० भन्दा बढी घर बगेको तथा घट्टेखोलामा पनि घरमा क्षति पुगेको उल्लेख छ। सिर्दिबासका रामबहादुर गुरुङको एउटा कच्ची घर बगेको र अर्को घरमा बाढी पसेको छ। माछाखोलाको तल्लो बस्तीमा पाँचदेखि सात घर र त्यति नै सङ्ख्याका टहरामा बाढी पसेको छ। धार्चे–३ सल्लेरीका २० देखि २२ घर जोखिममा रहेको प्रहरीले जनाएको छ।
पहिरोले खोला थुनेपछि बाढी आएको प्रारम्भिक अनुमान छ। चुमनुब्री–६ को उङ्गिलुङ खोला र लोक्पा–चुम्लिङ क्षेत्रको स्यार खोलामा पहिरो खसेको हुन सक्ने बताइएको छ। बुढीगण्डकीको बहाव घटेपछि सिर्दिबास क्षेत्रमा नदी फेरि थुनिएको सूचना आएको छ। घटनाको यकिन कारण र क्षतिको पूर्ण विवरण संकलन हुन बाँकी छ।
बाढीको जोखिमपछि गोरखाको आरुघाट बजार खाली गराइएको छ। प्रशासन र प्रहरीले नदी तटीय क्षेत्रका बासिन्दालाई सुरक्षित स्थानमा जान आग्रह गर्दै आएको छ। नदीमा पानीको बहाव घट्ने र बढ्ने क्रम जारी रहेकाले जोखिम क्षेत्रका बासिन्दालाई सतर्क रहन भनिएको छ।
