बेलारुसमा सामूहिक सुरक्षा सन्धि सङ्गठनका दुई संयुक्त सैन्य अभ्यास शुरु
ड्रागन मिडिया समाचार कक्ष
सामूहिक सुरक्षा सन्धि सङ्गठनले आइतबार बेलारुसमा ‘इन्डेस्ट्रक्टिबल ब्रदरहुड–२०२६’ र ‘ब्यारियर–२०२६’ नामका दुई संयुक्त सैन्य अभ्यास शुरु गरेको छ। अभ्यासमा एक हजार पाँच सयभन्दा बढी सैनिक र तीन सयभन्दा बढी सैन्य तथा विशेष उपकरण सहभागी हुनेछन्। तीमध्ये करिब ८० मानवरहित हवाई यान छन्।
बेलारुसको भितेब्स्क सहरस्थित विजय चोकमा शान्ति स्थापनाका लागि खटिने सामूहिक सुरक्षा सन्धि सङ्गठनका सैनिकलाई समेटेर सञ्चालन हुने कमान्ड पोस्ट अभ्यासको उद्घाटन समारोह आयोजना गरिएको थियो। समारोहमा बेलारुस, कजाखस्तान, किर्गिस्तान, रुस र ताजिकिस्तानका सैनिक टोली सहभागी भए। उनीहरूले यस क्षेत्रका सोभियत मुक्तिदाता, छापामार तथा भूमिगत प्रतिरोधी योद्धाको स्मृतिमा बनेका स्मारकमा पुष्पगुच्छा अर्पण गरे।
समारोहमा बेलारुसका सशस्त्र बलका जनरल स्टाफ प्रमुख तथा प्रथम उपरक्षामन्त्री मेजर जनरल भ्लादिमिर बेली, सामूहिक सुरक्षा सन्धि सङ्गठनको संयुक्त स्टाफका उपप्रमुख लेफ्टिनेन्ट जनरल रुस्लान श्पेकबाएभ र बेलारुसका सशस्त्र बलअन्तर्गत विशेष सैन्य कारवाही बलका कमान्डर कर्नेल अलेक्जान्दर इल्युकेभिच सहभागी थिए।
समारोहमा बेलीले विश्व सुरक्षाको परिदृश्य बदलिँदै गएको बताउँदै बढ्दो जोखिमको सामना गर्न सङ्गठनभित्र क्षेत्रीय सहकार्य सुदृढ गर्नुपर्नेमा जोड दिए। पश्चिमी मुलुकका नीति र गतिविधिले क्षेत्रीय सुरक्षा जोखिम बढाइरहेको उनको भनाइ थियो। उनले प्रभावकारी संयुक्त सैन्य अभ्यासको महत्त्व पनि औँल्याए।
यसैबीच, मिन्स्क क्षेत्रमा रहेको विकिरण, रासायनिक तथा जैविक सुरक्षा ब्रिगेडको आठौँ इकाइमा ‘ब्यारियर–२०२६’ अन्तर्गत विशेष अभ्यासको उद्घाटन गरिएको छ। यस अभ्यासमा विकिरण, रासायनिक तथा जैविक जोखिमविरुद्ध संयुक्त सुरक्षा र चिकित्सकीय सहयोगको अभ्यास गरिनेछ।
दुवै अभ्यासमा सशस्त्र बलका साथै आन्तरिक मामिला निकाय, प्रहरी, आन्तरिक सुरक्षा बल र आपत्कालीन सेवाका कर्मचारी सहभागी हुनेछन्। ‘इन्डेस्ट्रक्टिबल ब्रदरहुड–२०२६’मा शान्ति स्थापना अभियानमा केन्द्रित अभ्यास हुनेछ भने ‘ब्यारियर–२०२६’मा जैविक जोखिमको प्रतिकार गर्ने परिदृश्यको अभ्यास गरिनेछ। यी अभ्यास क्रमशः लोस्भिदो र स्तारादारोज्स्की सैन्य अभ्यासस्थलमा सञ्चालन हुनेछन्।
सामूहिक सुरक्षा सन्धि सङ्गठनमा आर्मेनिया, बेलारुस, कजाखस्तान, किर्गिस्तान, रुस र ताजिकिस्तान गरी छ सदस्य राष्ट्र छन्।
