भान्सको पत्रमा इरानले अझै जवाफ दिएको छैन : सुरक्षा परिषदका सचिव
ड्रागन मिडिया समाचार कक्ष
इरानको सर्वोच्च राष्ट्रिय सुरक्षा परिषदका सचिव मोहसिन रेजाईले अमेरिकी उपराष्ट्रपति जेडी भान्सको पत्र पढिसकेको तर त्यसको जवाफ नदिएको बताएका छन्।
अमेरिकी राष्ट्रपति डोनाल्ड ट्रम्पको निर्देशनमा पठाइएको उक्त पत्र बिहीबार तेहरान पुगेको र त्यसमा शान्तिवार्ता पुनः शुरु गर्न आग्रह गरिएको अमेरिकी सञ्चारमाध्यम वाल स्ट्रिट जर्नलले जनाएको छ।
इरानको सरकारी दूरदर्शनसँग शनिबार कुरा गर्दै रेजाईले पत्रमा वासिङ्टनको बोलीमा आएको परिवर्तनलाई “राम्रो सङ्केत” भने। अमेरिकी पक्षले यस विषयमा मौनता राखेकाले थप विवरण दिन नचाहेको उनले बताए।
अमेरिकाले इरानका सात सर्त पूरा गर्नुपर्नेमा रेजाईले जोड दिए। “हाम्रा सर्त पूरा नभएसम्म होर्मुज जलडमरूमध्य खोलिने छैन र हामी वार्तामा बस्ने छैनौँ,” उनले भने। वासिङ्टनले अर्को प्रस्ताव पनि दिएको र त्यसका अस्पष्ट विषय कूटनीतिक माध्यमबाट सम्बोधन भइरहेको उनले बताए।
अमेरिकाले कुनै गल्ती गरे इरानले “विनाशकारी प्रहार” गर्ने चेतावनी पनि रेजाईले दिए। शनिबार नै इरानी सशस्त्र बलका प्रमुख अली अब्दोल्लाहीले शत्रुपक्षको गतिविधि र तयारीमाथि निगरानी भइरहेको बताए। कुनै पनि “शत्रुतापूर्ण कदम” चालिए तत्काल र प्रभावकारी जवाफ दिइने तथा त्यसको भौगोलिक सीमा नहुने उनको चेतावनी थियो।
फेब्रुअरी २८ मा इजरायल र अमेरिकाले तेहरानसहित इरानका विभिन्न शहरमा संयुक्त आक्रमण गरेका थिए। त्यसको जवाफमा इरानले इजरायल र क्षेत्रमा रहेका अमेरिकी सैन्य अखडा तथा सम्पत्तिलाई लक्षित गर्दै क्षेप्यास्त्र र मानवरहित हवाई यानबाट आक्रमण गरेको थियो। त्यसपछि इरानले होर्मुज जलडमरूमध्यमा आफ्नो नियन्त्रण कडा बनाएको थियो।
युद्धरत पक्षबीच अप्रिल ८ मा युद्धविराम भएको थियो। जुन १८ मा इरान र अमेरिकाले क्षेत्रका सबै मोर्चामा युद्ध अन्त्य गर्ने समझदारीपत्रमा हस्ताक्षर गरेका थिए। त्यसअनुसार आणविक कार्यक्रम र प्रतिबन्ध हटाउने विषयमा अन्तिम सहमति जुटाउन दुवै देशले अगस्ट १७ भित्र वार्ता गर्ने तय भएको थियो। तर सहमतिका लागि पर्याप्त प्रगति हुन सकेन।
