चिनियाँ भाषा सिकाइले इन्डोनेसियाली युवाका लागि अध्ययन र रोजगारीका अवसर खोल्दै
ड्रागन मिडिया समाचार कक्ष
चिनियाँ भाषा सिक्ने इन्डोनेसियाली युवाको सङ्ख्या बढ्दै गएको छ। भाषा सिकाइले चीनमा उच्च शिक्षा हासिल गर्ने अवसरसँगै इन्डोनेसियामै व्यावसायिक क्षेत्रमा अघि बढ्ने बाटो पनि खोलिरहेको छ।
जकार्तामा आइतबार आयोजित चीनमा अध्ययन तथा रोजगारीसम्बन्धी मेलामा बेइजिङ विश्वविद्यालय र छिङह्वा विश्वविद्यालयसहित २१ चिनियाँ विश्वविद्यालय सहभागी भए। चीनमा पढ्ने अवसरबारे बुझ्न विद्यार्थी, चिनियाँ भाषा सिकिरहेका युवा र अभिभावक गरी करिब तीन हजार जना मेलामा पुगेका थिए।
मेलामा सहभागी १६ वर्षीया क्यालिस्टा ज्याकलिन विजायाले चीनमा औषधि विज्ञान पढ्ने इच्छा सुनाइन्। माध्यमिक विद्यालयको पहिलो वर्षमा अध्ययनरत उनले ११ वर्षदेखि चिनियाँ भाषा सिक्दै आएकी छन्। अध्ययनपछि सिकेको ज्ञान इन्डोनेसिया फर्केर धेरै मानिसको सेवामा लगाउने उनको लक्ष्य छ। त्यसका लागि उनी चिनियाँ भाषा दक्षता परीक्षा ‘एचएसके’मा आफ्नो अङ्क सुधार्ने तयारीमा छिन्।
उनका सहपाठी १५ वर्षीय रिचर्ड धर्मा हङनाटाले प्राथमिक विद्यालयको पहिलो वर्षदेखि चिनियाँ भाषा पढ्दै आएका छन् र त्यसमा धाराप्रवाह संवाद गर्न सक्छन्। बेइजिङ, साङ्घाईलगायत चिनियाँ शहरको भ्रमणले चीनको विकासप्रति उनको रुचि बढाएको छ। गणित र भौतिकशास्त्रमा विशेष रुचि राख्ने उनी चीनमा इन्जिनियरिङ पढ्न चाहन्छन्। विद्यालयको दोस्रो वर्षपछि एचएसके परीक्षा दिएर विश्वविद्यालय आवेदनका लागि उच्च अङ्क ल्याउने उनको योजना छ।
इन्डोनेसियामा चिनियाँ भाषा शिक्षा केन्द्र सञ्चालन गर्ने शिक्षिका चङ वेन्टिङका अनुसार पछिल्ला वर्षमा आफ्ना बालबालिकालाई चिनियाँ भाषा सिकाउन चाहने अभिभावक र चीनमा अध्ययन गर्न इच्छुक विद्यार्थीको सङ्ख्या बढेको छ। उनको संस्थामा एक समूहमा भर्ना हुने विद्यार्थी सङ्ख्या एक दशकअघि करिब ५० रहेकामा अहिले झन्डै ५०० पुगेको छ।
प्राथमिक तहमा चिनियाँ अक्षर र पिनयिन सिक्नेदेखि विश्वविद्यालयका विषय र भविष्यको रोजगारीबारे सोच्नेसम्म, चिनियाँ भाषा इन्डोनेसियाली युवाको शैक्षिक यात्राको हिस्सा बन्दै गएको छ। भाषाको ज्ञानले विश्वविद्यालयमा प्रवेश पाउने मात्र होइन, रोजगारीको अवसरसमेत विस्तार गरिरहेको छ।
सन् २०२५ मा बेइजिङस्थित चीन पेट्रोलियम विश्वविद्यालयबाट पेट्रोलियम इन्जिनियरिङमा स्नातक गरेका डेक्स्टर गोडविन मेलामा आफ्नो अनुभव बाँड्न आएका थिए। विश्वविद्यालयको पेट्रोलियम इन्जिनियरिङसम्बन्धी विशेषताबारे जानकारी पाएपछि उनले चीनमा अध्ययन गर्ने निर्णय गरेका थिए। चार वर्षको अध्ययनका क्रममा उनले विषयगत ज्ञानसँगै चिनियाँ भाषा पनि सिके। अहिले उनी इन्डोनेसियामै सञ्चालित एक तेल कम्पनीमा काम गर्छन्।
“चीन पेट्रोलियम विश्वविद्यालयमा चार वर्ष पढ्न पाउनु र सिकेको ज्ञान व्यवहारमा उतार्न पाउनु मेरा लागि सौभाग्य हो,” उनले भने। अध्ययनका क्रममा प्राप्त शैक्षिक तालिम र शिक्षकहरूको सहयोगबाट धेरै लाभ भएको उनले बताए।
चीन र इन्डोनेसियाबीच व्यापार, पूर्वाधार, ऊर्जा लगायतका क्षेत्रमा सहकार्य विस्तार हुँदै जाँदा चिनियाँ भाषा र विषयगत दक्षता भएका युवाका लागि रोजगारीका अवसर पनि बढिरहेका छन्।
चाइनिज टेस्टिङ इन्टरनेसनलका अनुसार सन् २००१ मा इन्डोनेसियामा एचएसके परीक्षा सुरु भएयता देशभर ५६ परीक्षा केन्द्र स्थापना भएका छन् र तीन लाखभन्दा बढीले परीक्षा दिइसकेका छन्। सन् २०२६ मा एचएसके परीक्षा दिने सङ्ख्याका आधारमा इन्डोनेसिया विश्वमा चौथो स्थानमा रहेको छ।
संस्थाका उपमहाप्रबन्धक लिउ स्याओलोङले चिनियाँ भाषा सिकाइ, चीनमा अध्ययन र रोजगारीबीचको सम्बन्ध अझ नजिकिँदै गएको बताए। द्विपक्षीय सहकार्यका क्षेत्र विस्तार भइरहेकाले चिनियाँ भाषा र विशेष विषयको ज्ञान दुवै भएका युवाको माग श्रम बजारमा बढिरहेको उनको भनाइ छ।
इन्डोनेसियास्थित चिनियाँ दूतावासका शिक्षा सल्लाहकार छन वुले युवा आदानप्रदानले दुई देशबीचको मैत्री कायम राख्न महत्त्वपूर्ण भूमिका खेल्ने बताए। उनले शैक्षिक अनुभवमार्फत चीनलाई अझ गहिरो रूपमा बुझ्न थप इन्डोनेसियाली युवालाई स्वागत गरिने बताए।
