युक्रेनको पुनर्निर्माणबारे छलफल गर्न अमेरिका, ईयू र युक्रेनी प्रतिनिधि बुधबार ब्रसेल्समा भेट्ने
ड्रागन मिडिया समाचार कक्ष
युरोपेली संघ (ईयू), अमेरिका र युक्रेनका प्रतिनिधिहरू युद्धपछिको युक्रेनको पुनर्निर्माण र समृद्धिबारे छलफल गर्न बुधबार ब्रसेल्समा भेट्ने भएका छन्। युरोपेली आयोगकी प्रवक्ता पाउला पिन्होले मंगलबार जानकारी दिएकी हुन्।
युरोपेली आयोगले आयोजना गर्ने बैठकमा फ्रान्स, जर्मनी, बेलायत, नेटो र विश्व बैंकका प्रतिनिधिहरू पनि सहभागी हुनेछन्। बैठकमा आयोगको प्रतिनिधित्व राष्ट्रिय सुरक्षा सल्लाहकार तहका अधिकारीले गर्ने भए पनि उनको नाम सार्वजनिक गरिएको छैन। अमेरिकी प्रतिनिधिमण्डलको सहभागिताबारे पनि थप विवरण उपलब्ध नभएको प्रवक्ता पिन्होले बताइन्।
बैठक मियामीमा युक्रेनी र अमेरिकी प्रतिनिधिबीच भएका अघिल्ला छलफलको निरन्तरता हुने र युक्रेनमा “दिगो तथा स्थायी शान्ति” स्थापना गर्ने लक्ष्यमा केन्द्रित रहने उनले बताइन्।
नेटोकी प्रवक्ता एलिसन हार्टले पनि यसै साता ब्रसेल्समा नेटोका प्रतिनिधिले फ्रान्स, जर्मनी, बेलायत र अमेरिकाका प्रतिनिधिसँग युक्रेन युद्धको “न्यायोचित र दिगो” अन्त्यका उपायबारे छलफल गर्ने पुष्टि गरेकी छन्। उनका अनुसार बैठकमा मियामी र ओस्लोमा भएका अघिल्ला छलफलका विषय अघि बढाइनेछ। नेटोले बैठकको मिति, सहभागी र विस्तृत कार्यसूची सार्वजनिक गरेको छैन।
अमेरिकी विशेष दूत स्टिभ विटकफले सोमबार सामाजिक सञ्जालमार्फत अमेरिका, फ्रान्स, जर्मनी, बेलायत, ईयू र नेटोका प्रतिनिधि ब्रसेल्समा भेटेर युक्रेनका लागि सुरक्षा प्रत्याभूति, युद्धपछिको युरोपेली सुरक्षा संरचना र युक्रेनको पुनर्निर्माणलाई सहयोग गर्ने आर्थिक अवसरबारे छलफल गर्ने बताएका थिए।
विटकफका अनुसार अमेरिकाले नोभेम्बर १० र ११ मा संयुक्त अरब इमिरेट्सको राजधानी अबुधाबीमा रुस र युक्रेनबीच कार्यस्तरका वार्तामा मध्यस्थता गर्नेछ। वार्तामा युद्धपछिको सुरक्षा व्यवस्था, तनाव घटाउने उपाय, मानवीय प्रयास र शान्तितर्फका आगामी कदमबारे छलफल हुने उनले बताएका छन्।
