माटोवादी पत्रकारिताको आवश्यकता
सम्पादकीय
नेपालको मिडिया क्षेत्रमा माटोवादी पत्रकारिता देशप्रेम र जिम्मेवार दृष्टिकोणको नयाँ पहिचानका रूपमा उभिएको छ। यसको मूल सिद्धान्त स्पष्ट छ, देशप्रथम। यसले राष्ट्रिय स्वार्थ, सन्तुलित विदेश नीति र रचनात्मक आलोचनालाई केन्द्रमा राख्छ।
भू-राजनीतिक जटिलताबीच नेपाली मिडियाले कालापानी, लिपुलेक, लिम्पियाधुरा जस्ता विषयमा देशको भू–अखण्डताको पक्षमा दृढ रहनुपर्छ। मित्रता र आत्मसम्मानको सन्तुलन नै कूटनीतिक परिपक्वता हो।
तर हाल केही मिडिया व्यक्तित्वहरूको आक्रामकता, व्यक्तिगत आक्रमण र धम्कीपूर्ण व्यवहारले पत्रकारिताको मर्यादामा आघात पुर्याएको छ। यस्तो प्रवृत्तिले राष्ट्रिय एकता कमजोर बनाउँछ र समाजमा अस्थिरता फैलाउँछ।
चीनको बीआरआई, भारतको “नेबरहुड फर्स्ट” र अमेरिकाको “इन्डो–प्यासिफिक स्ट्राटेजी” बीच नेपालले सन्तुलित नीति अपनाउनुपर्छ। मिडियाको दृष्टिकोण पनि स्पष्ट हुनुपर्छ, कुनै विदेशी शिविरमा नढल्ने र सबै सहयोगलाई नेपाली हितको मापनबाट मूल्याङ्कन गर्ने।
माटोवादी पत्रकारिता यही सन्तुलनको पक्षधर हो। यसले अन्तर्राष्ट्रिय दबाबबीच पनि राष्ट्रिय हितलाई सर्वोपरि राख्ने आह्वान गर्छ। जिम्मेवार र संयमित मिडियामात्र नेपालको सार्वभौमिकता र एकताको सशक्त रक्षक बन्न सक्छ।
मिडिया राष्ट्रको दर्पण हो, यसले नेपालको वास्तविक अनुहार देखाउनुपर्छ: गर्विलो, स्वतन्त्र र सार्वभौमिक राष्ट्रको। ड्रागन मिडिया यही बाटोमा अग्रसर छ।
