कुनै पनि आक्रमणको प्रत्युत्तर दिने चेतावनी : इरान
तेहरान । इरानी विदेश मन्त्रालयका प्रवक्ता एस्माइल बागाईले सोमबार अमेरिकी सैन्य चालचलन र खाडी राज्यहरूसँगको संयुक्त सैन्य अभ्यासको प्रतिक्रियामा धम्की दिँदै भनेका छन्: ‘कुनै पनि आक्रमणको हामी व्यापक र पछुतो लाग्ने जस्तो प्रत्युत्तर दिनेछौं।’
तेहरानमा साप्ताहिक प्रेस सम्मेलनमा बोल्दै उनले यसअघि इजरायलले जुनमा गरेको सैन्य आक्रमणपछि इरान विरुद्ध अमेरिका र इजरायलका नयाँ दाबी र धम्कीहरू सामना गरिरहेको बताए। “हामी संकर युद्धको सामना गर्दै आएका छौं र अहिले पनि छौं,” बागाईले भने।
उनले पश्चिम एशियाका देशहरूलाई चेताउँदै भने, “इरान क्षेत्रीय असुरक्षाको एकमात्र लक्ष्य हुने छैन। असुरक्षा सारासफा हुने गर्छ।” उनले थपे, “शान्ति र अन्तर्राष्ट्रिय कानूनको आदर गर्ने कुनै पनि देशले अरू देशहरू विरुद्धका अमेरिकी धम्कीप्रति स्पष्ट अडान लिनुपर्छ।”
बागाईले इजरायल र अमेरिकासँग १२ दिने युद्धका अनुभवहरूलाई आधार बनाउँदै इरानले कुनै पनि आक्रमणको “निश्चित रूपले व्यापक र पछुतो लाग्ने जस्तो प्रत्युत्तर” दिने बताए।
अमेरिकी राष्ट्रपति डोनाल्ड ट्रम्पले इरानमाथि केन्द्रित ‘आर्मडा’ पश्चिम एशियातर्फ बढिरहेको बताएकोमा टिप्पणी गर्दै बागाईले विमानवाहक जहाजको क्षेत्रमा प्रवेशले “देशको रक्षा गर्ने इरानको संकल्प र गम्भीरतामा असर पार्न सक्दैन” भने।
उनले इरानी सशस्त्र बलहरूले देशको राष्ट्रिय सम्प्रभुता, गौरव र सुरक्षाको रक्षाका लागि आवश्यक क्षमता निरन्तर सुधार गर्दै सबै विकासक्रमहरू कडाइले निरीक्षण गरिरहेको जानकारी दिए।
इरान-अमेरिका सम्भावित वार्ताको सम्भावनाबारे सोधिएकाेमा प्रवक्ता बागाईले “युद्ध वा टकराव नचाहने पक्षसँग मात्र वार्ता सम्भव छ” भने। उनले स्पष्ट पार्दै भने, “हामीले कहिल्यै युद्धलाई स्वागत गरेका छैनौं र कूटनीति र वार्ताबाट टाढा भएका छैनौं। हामीले व्यवहारमा यो देखाएका छौं।”
ट्रम्पले इरानमा सरकार विरोधी प्रदर्शनलाई समर्थन गर्दै ‘मद्दत आउँदै छ’ भन्नुका साथै ‘विशाल’ नौसैन्य शक्ति इरानतर्फ बढिरहेको तर प्रयोग नहुने सम्भावना रहेको घोषणा गरेपछि अमेरिकी सैन्य संरचनामा तीव्रता आएको हो।
