युक्रेन वार्तामा गोपनीयता तोड्नेहरू नै समस्या हुन् : लावरोभको कडा सन्देश

मस्को । युक्रेन द्वन्द्व समाधान सम्बन्धी वार्तालाई लिएर भइरहेका सार्वजनिक टिप्पणीहरूप्रति रूसी विदेशमन्त्री सर्गेई लावरोभले तीव्र असन्तुष्टि जनाएका छन्। जनवरी २९, २०२६ मा सञ्चारमाध्यमका प्रश्नको जवाफ दिँदै उनले रूस वार्तालाई गोप्य, शान्त र पेशागत ढंगले अघि बढाउन चाहन्छ भन्ने स्पष्ट पारेका छन्।

लावरोभले भने, “युक्रेनी र अमेरिकी पक्षजस्तो हामी वार्ताबारे सार्वजनिक रूपमा टिप्पणी गर्दैनौं। गोप्य रूपमा सञ्चालन हुनुपर्ने वार्तामाथि खुलेआम बयानबाजी गर्नु उचित वार्ता अभ्यास र आधारभूत आचरणविरुद्ध हो।” उनका अनुसार, के–के विषयमा छलफल भइरहेको छ भनेर बाहिर बयान दिनेहरू वार्तालाई सहयोग होइन, अवरोध गरिरहेका छन्।

उनले रूसको आधिकारिक प्रस्ताव प्याकेज सन २०२४ को जुन महिनामै राष्ट्रपति भ्लादिमिर पुटिनले सार्वजनिक गरिसकेको र त्यसपछि पटक–पटक पुनः पुष्टि भइसकेको स्मरण गराए। “हाम्रा वार्ताकारहरू आवश्यक परे जुनसुकै ढाँचामा सम्पर्क जारी राख्छन्। उनीहरू आफ्नो जिम्मेवारी राम्रोसँग बुझ्छन्। जब ठोस नतिजा निस्कन्छ, त्यसबारे सञ्चारमाध्यमलाई जानकारी दिइनेछ,” लावरोभले स्पष्ट पारे।

द्वन्द्व समाधानका राजनीतिक आधारभूत मुद्दाहरू राष्ट्रपति पुटिनले पहिल्यै परिभाषित गरिसकेको र ती अहिलेसम्म अपरिवर्तित रहेको पनि उनले जोड दिए। बाँकी विषयहरूबारे भने उनले युक्रेनी र अमेरिकी नेताहरूको “विवेकमा छोड्ने” टिप्पणी गरे, जसले पछिल्ला दिनहरूमा निरन्तर सार्वजनिक बयान दिइरहेका छन्।

यस सन्दर्भमा उनले अमेरिकी सिनेटमा बोल्दै मार्को रुबियोले “सुरक्षा ग्यारेन्टीको विषय समाधान भइसकेको” दाबी गरेको प्रसंग उठाए। “उनीहरूले कुन सुरक्षा ग्यारेन्टीको कुरा गरिरहेका छन्, हामीलाई थाहा छैन,” लावरोभले भने, “तर ती ग्यारेन्टीहरू रूसविरोधी र नव–नाजी नीतिमा अघि बढिरहेको युक्रेनी शासनकै सुरक्षाका लागि देखिन्छन्।”

लावरोभका अनुसार, यदि उद्देश्य पूर्व युक्रेनको कुनै भागमा यही शासन जोगाइराख्ने र रूसविरुद्ध खतरा उत्पन्न गर्ने चौकीका रूपमा प्रयोग गर्ने हो भने, त्यस्ता ‘सुरक्षा ग्यारेन्टी’ ले वास्तविक सुरक्षा सुनिश्चित गर्न सक्दैनन्।

उनले अप्रिल २०२२ मा इस्तानबुलमा भएको सहमतिलाई स्मरण गर्दै भने, त्यतिबेला सामूहिक र अविभाज्य सुरक्षा प्रणालीमा आधारित सुरक्षा ग्यारेन्टीहरूमा सहमति बनेको थियो, जसले रूस र युक्रेन दुवैसहित सम्पूर्ण क्षेत्रको सुरक्षा समेट्थ्यो। रोचक पक्ष के थियो भने, ती ग्यारेन्टीहरूको मूल मस्यौदा युक्रेनी पक्ष स्वयंले प्रस्ताव गरेको थियो र रूसले त्यसलाई समर्थन गरेको थियो।

“तर के भयो, सबैलाई थाहा छ,” लावरोभले कटाक्ष गरे, “त्यतिबेलाका बेलायती प्रधानमन्त्री बोरिस जोनसनले युक्रेनलाई प्रारम्भिक रूपमा स्वीकृत भइसकेको सम्झौता हस्ताक्षर गर्नै दिएनन्।”

रूस अब राजनीतिक प्रचार र मिडियाले सिर्जना गर्ने हल्लाभन्दा पनि ठोस, सारगर्भित प्रस्तावहरूलाई मात्र आधार मानेर अघि बढ्ने लावरोभको स्पष्ट सन्देश थियो। “हामी वास्तविक सुरक्षामा केन्द्रित छौं, न कि क्षणिक राजनीतिक खेलमा,” उनले निष्कर्ष निकाले।