अनलाइन ठगीविरुद्ध कम्बोडियाको कडा प्रहार, एकै कारबाहीमा २ हजारभन्दा बढी विदेशी पक्राउ
फ्नोम पेन्ह। दक्षिण–पूर्वी एसियाली मुलुक कम्बोडियाले अनलाइन ठगी र साइबर अपराधविरुद्ध चलाएको व्यापक अभियान अन्तर्गत पछिल्लो कारबाहीमा २,०४४ जना विदेशी नागरिकलाई पक्राउ गरेको छ। आन्तरिक मामिला मन्त्रालयका एक प्रवक्ताले आइतबार यो जानकारी सार्वजनिक गरेका हुन्।
प्रवक्ताका अनुसार आठ फरक–फरक राष्ट्रियताका ती शंकास्पद व्यक्तिहरू शनिबार भियतनामसँग सीमा जोडिएको स्वाय रिएङ प्रान्तको बावेट सहरमा रहेको २२ वटा भवनसहितको एक क्यासिनो परिसरमा गरिएको विशेष छापामार कारबाहीका क्रममा पक्राउ परेका हुन्। सो क्षेत्र लामो समयदेखि अनलाइन ठगी र साइबर अपराधको केन्द्र बन्दै आएको आशंकाका बीच यो कारबाही गरिएको हो।
आन्तरिक मामिला मन्त्रालयका प्रवक्ता टच सोखाकले जारी गरेको विज्ञप्तिमा भनेका छन्, “यस कारबाहीले कम्बोडिया सरकारले अनलाइन ठगीमा संलग्न अपराधीविरुद्ध कहिल्यै नरम नहुने स्पष्ट सन्देश दिएको छ।” उनले थपे, “कम्बोडिया अपराधीका लागि सुरक्षित आश्रय होइन, बरु नरक हो।”
कम्बोडिया सरकारले पछिल्लो समय साइबर ठगी सञ्जालहरू पूर्ण रूपमा निर्मूल पार्ने उद्देश्यसहित अभूतपूर्व राष्ट्रियस्तरको अभियान सञ्चालन गरिरहेको छ। सरकारका अनुसार यस अभियानको मुख्य लक्ष्य देशको सुरक्षा, सार्वजनिक शान्ति–व्यवस्था र सामाजिक सुरक्षालाई जोगाउनु हो।
यसैबीच, कम्बोडियाको अनलाइन ठगीविरुद्ध संघर्षका लागि गठित एडहक समितिले गत साता सार्वजनिक गरेको प्रतिवेदन अनुसार पछिल्ला सात महिनामा २३ वटा राष्ट्रियताका ५,१०६ जना अनलाइन ठगीमा संलग्न शंकास्पद व्यक्ति पक्राउ परेका छन्। तीमध्ये ४,५३४ जनालाई उनीहरूको मूल देशमा डिपोर्ट गरिएको समितिले जनाएको छ।
विश्लेषकहरूका अनुसार कम्बोडियाले थालेको यो कडा अभियानले क्षेत्रीयस्तरमै साइबर अपराध नियन्त्रणमा बलियो सन्देश दिएको छ। अनलाइन ठगीलाई शून्य सहनशीलताका साथ सामना गर्ने सरकारको नीति आगामी दिनमा अझ कडा हुँदै जाने संकेतसमेत यस कारबाहीले दिएको छ।
