देशको रक्षा र सम्मानमा जीवन अर्पण गर्ने सैनिकप्रति सी चिनफिङको हार्दिक सम्मान
बेइजिङ। चिनियाँ राष्ट्रपति सी चिनफिङले वसन्त पर्व (स्प्रिङ फेस्टिभल) को अवसरमा देशका सैन्य अवकाशप्राप्त अधिकृत तथा सैनिकहरूलाई हार्दिक शुभकामना व्यक्त गरेका छन्।
चिनियाँ कम्युनिष्ट पार्टी (सीपीसी) केन्द्रीय समितिका महासचिव तथा केन्द्रीय सैन्य आयोग (सीएमसी) का अध्यक्ष समेत रहेका राष्ट्रपति सी ले शुक्रबार बेइजिङस्थित सेनासँग सम्बन्धित अवकाशप्राप्त सैनिक अधिकृतहरूको सम्मानमा आयोजित विशेष गालामा सहभागी हुँदै शुभकामना सन्देश दिएका हुन्।
उक्त अवसरमा राष्ट्रपति सी ले राष्ट्रको सार्वभौमसत्ता, सुरक्षा र विकासका लागि चिनियाँ सेनाले खेलेको ऐतिहासिक भूमिकाको उच्च मूल्याङ्कन गर्दै अवकाशप्राप्त सैनिकहरू राष्ट्रका अमूल्य सम्पत्ति भएको उल्लेख गरे। उनले कठिन परिस्थितिमा पनि देश र जनताको सेवामा समर्पित सैनिकहरूको योगदान कहिल्यै बिर्सन नहुने स्पष्ट पारे।
वसन्त पर्व परिवार, एकता र सम्मानको प्रतीक मानिने चीनको सबैभन्दा ठूलो चाड हो। यही अवसरमा अवकाशप्राप्त सैनिकहरूलाई सम्मान र आत्मीयता प्रकट गर्नु चीनको परम्परागत संस्कारको अभिन्न हिस्सा रहेको सन्देश राष्ट्रपति सीको सम्बोधनबाट झल्किएको छ।
कार्यक्रममा उपस्थित पूर्व सैनिक अधिकृतहरूलाई सम्बोधन गर्दै उनले पार्टी र राज्य सधैं सैनिक र पूर्व सैनिकको हित, सम्मान र कल्याणप्रति प्रतिबद्ध रहेको पनि दोहोर्याए। यसले चिनियाँ सेनाभित्र एकता, मनोबल र राष्ट्रप्रतिको निष्ठालाई अझ सुदृढ बनाउने विश्वास व्यक्त गरिएको छ।
