फ्राइबर्गको युरोपेली सपनामा तीन गोलको सुनौलो अग्रता : सेल्टा भिगोलाई घरमै ३–० ले ध्वस्त
कप्तान ग्रिफो भन्छन्: "भिगोमा कठिन हुन्छ भन्ने थाहा छ, तेस्रो गोल त्यसैको लागि"
फ्राइबर्ग (जर्मनी) । जर्मन क्लब एससी फ्राइबर्गले यूईएफए युरोपा लिगको क्वार्टरफाइनलको पहिलो लेगमा स्पेनिस क्लब सेल्टा भिगोमाथि ३–० को शानदार घरेलु जित निकाल्दै सेमिफाइनल पुग्ने सम्भावना बलियो बनाएको छ। क्लबको इतिहासकै पहिलो युरोपेली क्वार्टरफाइनलमा जुलियन सुस्टरको टोलीले सुरुदेखि नै आक्रामक खेल प्रदर्शन गरेको थियो।
फ्राइबर्गले खेलको सुरुआती मिनेटदेखि नै विपक्षीलाई दबाबमा राखेको थियो र त्यसको प्रतिफल १०औं मिनेटमै हात लाग्यो। भिन्सेन्जो ग्रिफोले बक्सको बायाँ कुनाबाट स्थान बनाउँदै प्रहार गरेको बल डिफ्लेक्सन हुँदै दायाँ कुनामा पुगेर जाली चुम्यो। सेल्टाका गोलरक्षक राडुले बचाउ गर्ने कुनै सम्भावना नै रहेन।
फ्राइबर्गले अग्रता लिएपछि रक्षात्मक खेल्नुको सट्टा नियन्त्रण कायमै राख्यो। उनीहरूको काउन्टर–प्रेसिङले स्पेनिस टोलीको आक्रमणको खतरालाई रोक्दै ३२औं मिनेटमा दोस्रो गोल सम्भव बनायो। फिलिप ट्राउले भिगोको पेनाल्टी क्षेत्र नजिकबाट बल जिते र इगोर माटानोभिचले संयमता राख्दै निक्लास बेस्टेलाई सहज रूपमा नजिकबाट गोल गर्ने अवसर दिलाए।
त्यसको केहीबेरमै फ्राइबर्गले अग्रता विस्तार गर्ने अर्को अवसर पायो। योहान मान्जाम्बीले दायाँपट्टिबाट प्रहार गरेको बल पोस्टमा लागेर फर्कियो, जसले पहिलो हाफको अन्त्यसम्म स्कोर २–० मै रह्यो।
दोस्रो हाफको सुरुमै सेल्टाका प्रशिक्षक क्लाउडियो गिराल्देजले दोहोरो परिवर्तन गरे पनि विपक्षी टोलीले खेलको लय बदल्न सकेन। फ्राइबर्गले नियन्त्रण कायमै राख्यो, यद्यपि केही समय स्पष्ट अवसरहरू भने सिर्जना हुन सकेनन्। युइटो सुजुकीले गोल गर्ने प्रयास गरे भने ७०औं मिनेटमा सेल्टाले अन्ततः एक अवसर बनायो, जसमा पूर्व लेभरकुसेन खेलाडी बोर्हा इग्लेसियासले बक्सको किनारबाट प्रहार गरेको बल क्रसबारमाथिबाट सामान्य अन्तरले बाहिरियो।
फ्राइबर्गले कर्नरबाट तेस्रो गोल थप्यो। बेस्टेले बायाँपट्टिबाट पुर्याएको क्रसमा माथियास गिन्टरले हवाई द्वन्द्व जित्दै हेडरमार्फत गोल गरे र स्कोर ३–० बनाए।
त्यसपछि फेर लोपेजले सेल्टाका लागि ढिलो अवसर गुमाए भने अर्कोतर्फ राडुले लुकास होलरको प्रहार रोक्दै थप गोल हुन दिएनन्। यो जितसँगै फ्राइबर्गले आगामी साता हुने दोस्रो लेगका लागि बलियो अग्रता हात पारेको छ।
फ्राइबर्गका कप्तान ग्रिफोले खेलपछि भने, “हामीले अविश्वसनीय प्रदर्शन गर्यौं, निकै परिपक्व र साहसी। हामीले राम्रा निर्णय लियौं, बल राम्ररी प्रयोग गर्यौं र त्यसपछि अवसरहरू आए। पहिलो मिनेटदेखि नै हामी स्पष्ट रूपमा उत्कृष्ट टोली थियौं। भिगोमा कठिन हुनेछ भन्ने हामीलाई थाहा छ, त्यसैले हामीले तेस्रो गोल चाहेका थियौं।”
